పూణే జిల్లాలో రోడ్డు చీల్చుకుని నీటి ధార ఎగిసిపడిన ఘటన

మహారాష్ట్రలోని పూణే జిల్లా తలేగావ్ దాభాడేలో శనివారం అరుదైన ఘటన చోటుచేసుకుంది. తారు రోడ్డు మధ్యలో నుంచి ఒక్కసారిగా భారీ ఒత్తిడితో నీరు పైకి ఎగిసిపడింది. రోడ్డు చీలిపోయి నీళ్లు బయటకు వచ్చాయి. ఈ ఘటన సీసీటీవీ కెమెరాలో రికార్డయింది.

తలేగావ్ దాభాడే మున్సిపల్ కౌన్సిల్ ఏడాదిన్నర క్రితం నీటి సరఫరా పథకం కోసం ఈ రోడ్డు కింద కొత్త పైప్లైన్ వేయించింది. తాజాగా ఈ పథకం ప్రారంభంలో భాగంగా శనివారం కొత్త నీటి ట్యాంక్ నుంచి పైప్లైన్‌లోకి ట్రయల్ రన్ కోసం నీటిని విడుదల చేశారు. అయితే, కొద్దిసేపటికే పైప్లైన్‌లో ఒత్తిడి పెరిగి రోడ్డు పగిలి నీరు ఎగిసిపడింది.

ఈ ఘటనలో ఎవరికీ గాయాలు కాలేదు. పైప్లైన్ ట్రయల్ రన్ సమయంలో ఈ లోపం తలెత్తడంతో నీటి సరఫరా పథకం వాయిదా పడే అవకాశం ఉంది. పైప్లైన్ నిర్మాణ నాణ్యతపై ఆందోళన వ్యక్తమవుతోంది.