అపరాల పంటల్లో కలుపు యాజమాన్యం: రైతులకు శాస్త్రవేత్త సూచనలు

వరంగల్ ప్రాంతీయ వ్యవసాయ పరిశోధనా స్థానం శాస్త్రవేత్త మధు అపరాల పంటల్లో కలుపు యాజమాన్యంపై రైతులకు సూచనలు అందించారు.

ఇటీవల కురిసిన వర్షాల కారణంగా అపరాల పంటల్లో కలుపు ఎక్కువైంది. ఈ కలుపు పంటల ఎదుగుదలకు ఆటంకంగా మారుతుంది. తొలి దశలోనే కలుపు నివారించడం చాలా ముఖ్యం.

విత్తిన వెంటనే 48 గంటల్లోపే పెంథాలిన్ 30% మందు 1.2 లీటర్లు 200 లీటర్ల నీటిలో కలిపి ఎకరానికి పిచికారీ చేయాలి. లేదా పెండిమిథాలిన్ CS 38.7% (స్టాంప్ ఎక్స్ట్రా) 700 మిల్లీలీటర్లు కూడా వాడొచ్చు.

పంట మొక్క పెరిగిన తర్వాత మళ్లీ కలుపు వస్తే, ఇమజేతాపైర్ 300-350 ml ఎకరానికి పిచికారీ చేయాలి. ఇది కంది, పెసర, మినుము పంటల్లో అన్ని రకాల కలుపును నివారిస్తుంది. గడ్డి జాతి కలుపు మాత్రమే ఉంటే, ప్రొఫక్సాజాపాప్ 250 ml లేదా క్విజలోఫాప్-ఇథైల్ 400 ml వాడాలి. ఇమజేతాపైర్ ప్లస్ ఇమజామాక్స్ (ఒడిస్సీ) 40 గ్రాములు ఎకరానికి వాడితే అన్ని రకాల కలుపు నియంత్రించవచ్చు.

కంది పంటలో నాటిన 45-50 రోజుల తర్వాత నిప్పింగ్ చేయాలి. పై నుంచి 10 సెం.మీ. తలకొనను తుంచడం వల్ల పక్క కొమ్మలు దృఢంగా వచ్చి పూత, కాయ ఎక్కువగా రావడానికి అవకాశం ఉంటుంది. ఈ పద్ధతితో 15% కంటే ఎక్కువ దిగుబడి లభిస్తుంది.

కలుపు నివారణ మందులు వాడిన తర్వాత 50-60 రోజులకు ఇంటర్ కల్టివేషన్ చేస్తే మంచిది. ఎడంగా నాటుకున్న పొలాల్లో ట్రాక్టర్ రోటవేటర్‌తో చేయవచ్చు. దగ్గర నాటుకున్న చోట గుంటక లేదా దొంతితో అంతర్పు చేసుకోవాలి.

సరైన కలుపు యాజమాన్యం వల్ల అపరాల దిగుబడి గణనీయంగా పెరుగుతుంది. రైతులు ఈ సలహాలను అనుసరించాలి.