పత్తి, సోయా, కంది పంటల్లో కలుపు నివారణపై శాస్త్రవేత్త సూచనలు

తెలంగాణలో ఖరీఫ్ సీజన్ లో పత్తి, సోయాబీన్, కంది పంటలు ప్రధానంగా సాగవుతున్నాయి. ప్రస్తుతం ఈ పంటలు 10 నుంచి 20 రోజుల దశలో ఉండగా, కలుపు నియంత్రణ ఎలా ఉండాలో ఆదిలాబాద్ కృషి విజ్ఞాన కేంద్రం శాస్త్రవేత్త డాక్టర్ రాజశేఖర్ వివరించారు.

ముందస్తు కలుపు నివారణకు మూడు పంటలకు ఒకే మందును సూచించారు. పెండిమెథలిన్ (స్టాంప్ ఎక్స్‌ట్రా రూపంలో) ఎకరానికి 700 మిల్లీ లీటర్లను 200 లీటర్ల నీటిలో కలిపి, విత్తిన 48 గంటల్లో పిచికారీ చేసుకోవాలి. దీనివల్ల మొదటి దశ కలుపు అదుపులో ఉంటుంది.

పత్తిలో 20-30 రోజుల వయసున్న కలుపు కోసం పోస్ట్-ఎమర్జెన్స్ హెర్బిసైడ్‌గా ‘ఇటువీడ్’ (పైరాక్సులామ్ + సోడియం) 250 మి.లీ. లేదా క్విజలోఫాప్-ఇథైల్ 400 మి.లీ. పిచికారీ చేయాలి. ఫ్లూజిఫాప్-బ్యూటైల్ (500 మి.లీ.) కూడా వాడవచ్చు. 30-40 రోజుల తర్వాత కలుపు నాలుగు ఆకుల దశకు చేరితే మందులు వాడకూడదని, అంతర కృషి లేదా డౌర ద్వారానే నివారణ చేయాలని సూచించారు.

సోయాబీన్‌లో ప్రీ-ఎమర్జెన్స్‌గా పెండిమెథలిన్‌తో పాటు ఫ్లూమియోక్సాజిన్ (సుమి మాక్స్) 100 మి.లీ. పిచికారీ చేసుకోవాలి. మొలక వచ్చిన తర్వాత గడ్డి జాతి కలుపుకు క్విజలోఫాప్-ఇథైల్ 400 మి.లీ. లేదా ప్రాపక్విజాఫాప్ 250 మి.లీ., వెడల్పాటి ఆకుల కలుపుతో పాటు గడ్డికి ఇమజెథాపైర్ 250 మి.లీ. (పర్సూట్) లేదా ఇమజెథాపైర్+ఇమజామాక్స్ (ఒడిస్సీ) 40 గ్రాములు వాడాలి. 30 రోజుల లోపు అంతర కృషి చేస్తే వేరు వ్యవస్థకు ఇబ్బంది ఉండదు.

కంది అంతర పంటగా విత్తినప్పుడు కూడా సోయా మాదిరిగానే ప్రీ-ఎమర్జెన్స్‌గా పెండిమెథలిన్, పోస్ట్-ఎమర్జెన్స్‌గా 20 రోజుల దశలో ఇమజెథాపైర్ 250 మి.లీ. లేదా ఇమజెథాపైర్+ఇమజామాక్స్ 40 గ్రాములు పిచికారీ చేస్తే సరిపోతుంది.

సిఫారసు కాని, తెలియని కలుపు మందులు ఎట్టి పరిస్థితుల్లోనూ వాడకూడదని శాస్త్రవేత్త హెచ్చరించారు. సకాలంలో సరైన మోతాదులో మందులు వాడితే ఖర్చు తగ్గడంతో పాటు మొక్కలు ఆరోగ్యంగా ఎదిగి చీడపీడల నుండి రక్షణ లభిస్తుందని తెలిపారు.