పశ్చిమ గోదావరిలో ప్రకృతి వ్యవసాయం: తుఫానుల్లోనూ నిలబడిన వరి పంటలు

పశ్చిమ గోదావరి జిల్లాలో వరుసగా వచ్చిన రెండు తుఫానుల్లో ప్రకృతి వ్యవసాయం చేసిన రైతుల వరి పంటలు ఎక్కువగా నిలబడ్డాయి. రసాయన ఎరువులు వాడిన పొలాలు దాదాపు పూర్తిగా నేలకొరిగాయి.

అక్టోబర్ 27, 28 తేదీల్లో ఒక తుఫాను, నవంబర్ 2న మరో తుఫాను జిల్లాను తాకింది. గంటకు 120 కిలోమీటర్ల వేగంతో ఈదురుగాలులు వీచాయి. భారీ వర్షాలు కురిశాయి. జిల్లా వ్యాప్తంగా వందలాది ఎకరాల్లో వరి పంట నేలకొరిగింది.

మొగల్తూరు గ్రామానికి చెందిన కుక్కల నాగరాజు తన ఎకరం పొలంలో సంపత్తి స్వర్ణ రకం వరిని ప్రకృతి సాగు చేశారు. తుఫాను గాలుల్లో ఆయన పంటలో 50 శాతం నిటారుగా నిలబడింది. పక్కనే రసాయన పద్ధతిలో సాగు చేసిన చెన్ను శ్రీను పొలం పూర్తిగా పాడైపోయింది.

పాలకొల్లు మండలం అరట్లకట్టకు చెందిన మామిడి శెట్టి రాంబాబుకు 10 ఎకరాల పొలం ఉంది. అందులో తొమ్మిది ఎకరాల్లో రసాయన సాగు చేయగా అది పూర్తిగా దెబ్బతింది. ఒక్క ఎకరంలో 1318 రకం విత్తనాలతో చేసిన ప్రకృతి సాగు మాత్రం 80 శాతానికి పైగా పచ్చగా నిలిచింది.

పెంటపాడు మండలం బి. కొండేపాడుకు చెందిన పాల సాయి పద్మ, అత్తిలి మండలం ఒరిగేడు గ్రామానికి చెందిన చీనుల విజయదుర్గ కూడా ప్రకృతి సాగు చేశారు. గింజ గట్టిపడే దశలో తుఫాను తాకినా వారు పంటలో 50 శాతం కాపాడుకోగలిగారు.

ప్రకృతి సాగులో మొక్క కాండం, వేరు వ్యవస్థ బలంగా ఉంటుందని ఈ రైతుల అనుభవాలు చూపిస్తున్నాయి. జీవామృతం, ఘన జీవామృతం వంటి పద్ధతులు నేలకు సహజ సారాన్ని అందించినట్లు వారు తెలిపారు.