సిద్దిపేట: భర్త కోసం 44 ఏళ్లు ఎదురుచూసిన మహిళ, చివరకు భర్త మృతదేహం అందింది

సిద్దిపేట జిల్లా చిల్లాపూర్‌లో ఓ మహిళ భర్త కోసం 44 ఏళ్లు ఎదురుచూసిన ఘటన ఆలస్యంగా వెలుగులోకి వచ్చింది.

లక్ష్మి అనే ఇల్లాలు 1980లో చంద్రయ్యతో వివాహం చేసుకుంది. పెళ్లయిన రెండేళ్లకే భర్త ఉపాధి కోసం సౌదీ అరేబియా వెళ్లారు.

ప్రారంభంలో ఉత్తరాలు వచ్చినా, ఆ తర్వాత సంప్రదింపులు పూర్తిగా నిలిచిపోయాయి. ఫోన్ సౌకర్యం లేని దశలో భర్తను సంప్రదించడం ఆమెకు సాధ్యం కాలేదు.

లక్ష్మి కూలి పనులు చేస్తూ, అత్తమామలైన బాలవ్వ, కృష్ణయ్యలను చూసుకుంటూ గ్రామంలోనే జీవితం గడిపింది. కొన్నేళ్ల క్రితం అత్తమామ చనిపోయినప్పటికీ భర్తకు సమాచారం ఇవ్వలేకపోయింది.

ఇటీవల సౌదీలో చంద్రయ్య ఒక నెల క్రితం మరణించినట్లు అధికారులు గుర్తించారు. పాత పాస్పోర్ట్ ఆధారంగా అతడి నివాస వివరాలు సేకరించి భార్యకు చేరవేశారు.

దర్యాప్తులో 15 ఏళ్ల క్రితమే అతడి పాస్పోర్ట్, వీసా గడువు ముగిసినట్లు తెలిసింది. ఆధార్ కార్డు లేకపోవడంతో పాస్పోర్ట్ రెన్యువల్ చేయించుకోలేక, చిన్న చిన్న కూలి పనులు చేస్తూ అక్రమంగా నివసించినట్లు తెలుస్తోంది.

చివరకు చంద్రయ్య మృతదేహాన్ని గ్రామానికి తరలించారు. లక్ష్మి భర్త మృతదేహాన్ని దర్శించి తీవ్ర భావోద్వేగానికి లోనైంది. గ్రామస్తులు అంత్యక్రియలు నిర్వహించారు.