లెనిన్: ప్రపంచంలో తొలి అణుశక్తి ఐస్ బ్రేకర్

1959లో సోవియట్ యూనియన్ ప్రపంచంలోనే తొలి అణుశక్తి ఐస్ బ్రేకర్‌ను ప్రారంభించింది. దీని పేరు లెనిన్. ఇది ఆర్కిటిక్ సముద్రంలో మంచును చీల్చి ఇతర నౌకలకు సురక్షిత మార్గం కల్పించేది.

ఈ నౌక అణు రియాక్టర్ ద్వారా విద్యుత్ ఉత్పత్తి చేసేది. దీంతో ఇంధనం నింపాల్సిన అవసరం లేకుండా నెలల తరబడి నిరంతరంగా సముద్రంలో సేవలు అందించేది. మూడు దశాబ్దాల పాటు సేవలు అందించిన లెనిన్ 6,54,000 నాటికల్ మైళ్ల దూరం ప్రయాణించింది. 3,741 నౌకలను మంచు ప్రాంతాల గుండా సురక్షితంగా నడిపించింది.

1989లో లెనిన్ సేవలు నిలిపివేశారు. రద్దు చేయకుండా రష్యా దీన్ని ముర్మాన్స్క్ నగరంలో మ్యూజియంగా మార్చింది. నౌక లోపల కంట్రోల్ రూమ్, అణు రియాక్టర్ వ్యవస్థలు, నావిగేషన్ పరికరాలు నేటికీ సందర్శకులను ఆకట్టుకుంటున్నాయి.

ప్రస్తుతం రష్యా తన అణు ఐస్ బ్రేకర్ నౌకాదళాన్ని విస్తరిస్తోంది. లెనిన్ నౌక ఆధునిక అణు సముద్ర సాంకేతికతకు పునాది వేసిన చారిత్రక మైలురాయిగా నిలిచింది.