కూచిపూడిలో యోగాంధ్ర వేడుకలు: విద్యార్థులతో కలెక్టర్, MLA యోగా

కృష్ణా జిల్లా కూచిపూడిలో యోగాంధ్ర వేడుకలు ఘనంగా నిర్వహించారు. ఈ సందర్భంగా జిల్లా కలెక్టర్ బాలాజీ, పామర్రు MLA వర్ల కుమార్ రాజా విద్యార్థులతో కలిసి సామూహిక యోగాసనాలు వేశారు.

MLA వర్ల కుమార్ రాజా మాట్లాడుతూ, ముఖ్యమంత్రి చంద్రబాబు నాయుడు 76 ఏళ్ల వయసులో చురుగ్గా ఉండటానికి దశాబ్దాలుగా చేస్తున్న యోగా సాధనే కారణమని చెప్పారు. 'యోగా చేద్దాం, ఆరోగ్యంగా జీవిద్దాం' అనే నినాదాన్ని ప్రజలు అందరూ స్వీకరించాలని ఆయన ఆకాంక్షించారు.

కలెక్టర్ బాలాజీ మాట్లాడుతూ, యోగా వల్ల మానసిక చురుకుదనం పెరుగుతుందని, ఫలితంగా పని సామర్థ్యం రెట్టింపు అవుతుందని తెలిపారు. యోగా సాధనతో ఆర్థికాభివృద్ధికి కూడా దోహదపడొచ్చని అభిప్రాయపడ్డారు. విద్యార్థులు యోగా అలవాటు చేసుకోవడం వల్ల ఏకాగ్రత పెరిగి చదువులో రాణించగలరని సూచించారు.

యోగా ప్రాచీన భారతీయ సంప్రదాయమని, దీన్ని నిత్యం చేస్తే ఆరోగ్యం మెరుగుపడుతుందని ఇరువురు నేతలు పేర్కొన్నారు.