శేషాచలం అడవుల్లో 477 ఏళ్ల నాటి విజయనగర శాసనం గుర్తింపు

తిరుమల సమీపంలోని శేషాచలం అటవీ ప్రాంతంలో పురావస్తు శాఖ అధికారులు అరుదైన శాసనాన్ని గుర్తించారు. సదాశివకోనలో లభించిన ఈ శాసనం 477 సంవత్సరాల క్రితం విజయనగర రాజు సదాశివ దేవరాయల కాలానికి చెందింది.

తెలుగు, కన్నడ, తమిళ భాషల్లో ఉన్న ఈ శాసనంలో గుడిమల్లం పరశురామేశ్వర స్వామి ఆలయానికి భూములు, నైవేద్యాలు, అంగరంగ భోగాల కోసం సదాశివ దేవరాయలు భూములు కేటాయించినట్లు వివరాలు ఉన్నాయి.

ఈ శాసనం శక సంవత్సరం 1471వదిగా గుర్తించారు. ఆదాయ నిర్వహణ బాధ్యత లింగన వడియ, అతని శిష్యుడు సంపన్న వడియకు అప్పగించినట్లు శాసనం పేర్కొంది.

పురావస్తు శాఖ డైరెక్టర్ మునిరత్నం రెడ్డి నేతృత్వంలో జరిగిన ఈ అన్వేషణలో అటవీ శాఖ అధికారులు సహకరించారు. పూర్వం శ్రీశైలం నుంచి తిరుమలకు వెళ్లే భక్తుల మార్గంలో ఇది ఒక ముఖ్య ప్రాంతమని ఆయన తెలిపారు.

పురావస్తు శాఖ ఇప్పటివరకు దేశవ్యాప్తంగా 85 వేలకు పైగా శాసనాలను నమోదు చేసింది. వాటిలో 10 వేల శాసనాలను ‘భారశ్రీ’ ప్రాజెక్టులో డిజిటలైజ్ చేసి ప్రజలకు ఉచితంగా అందుబాటులో ఉంచారు.

కొత్తగా బయటపడిన శాసనం వల్ల గుడిమల్లం ఆలయానికి వేల ఎకరాల భూములు తిరిగి దక్కే అవకాశం ఉందని తిరుపతి ఎంపి గురుమూర్తి అన్నారు. ఆలయంలో కోనేరు అభివృద్ధి తదితర పనులు త్వరలో ప్రారంభమవుతాయని ఆయన చెప్పారు.