94 ఏళ్ల వయస్సులో అమెరికా పౌరసత్వం వదులుకుని భారత పౌరసత్వం కోసం దరఖాస్తు చేసిన మహాలక్ష్మమ్మ

బాపట్ల జిల్లా చిన్నగంజం మండలం చింతగుంపల గ్రామానికి చెందిన కొండ్రగుంట మహాలక్ష్మమ్మ (94) భారత పౌరసత్వం పొందేందుకు దరఖాస్తు చేశారు.

ఆమె 1993లో కుటుంబంతో కలిసి అమెరికా వెళ్లి, 2000లో అమెరికా పౌరసత్వం పొందారు. 2018లో స్వదేశానికి తిరిగి వచ్చిన ఆమె, గత ఎనిమిదేళ్లుగా స్వగ్రామంలోనే నివసిస్తున్నారు. చివరి రోజులు సొంత ఊరిలో గడపాలనే కోరికతో ఆమె ఈ నిర్ణయం తీసుకున్నారు.

భారతీయ పౌరురాలిగా మళ్లీ గుర్తింపు పొందాలని నిర్ణయించుకున్న మహాలక్ష్మమ్మ, పౌరసత్వ ప్రక్రియలో భాగంగా బాపట్ల జిల్లా కలెక్టర్ వినోద్ కుమార్ సమక్షంలో ప్రమాణం చేశారు. భారత రాజ్యాంగాన్ని గౌరవిస్తూ, దేశ చట్టాలను పాటిస్తానని ఆమె ప్రతిజ్ఞ చేశారు.

ఈ నివేదికను కేంద్ర హోం శాఖకు పంపనున్నట్లు అధికారులు తెలిపారు. అమెరికా పౌరసత్వాన్ని రద్దు చేసుకున్న తర్వాత ఆమెకు భారత పౌరసత్వం మంజూరు అవుతుందని వారు చెప్పారు. దీనికి సంబంధించిన ప్రక్రియ త్వరలో పూర్తి చేయాల్సి ఉంది.