భద్రాద్రి కొత్తగూడెం: ధమ్మపేట ఆశ్రమ పాఠశాలలో అడ్మిషన్లు పూర్తి

భద్రాద్రి కొత్తగూడెం జిల్లా పాల్వంచ మండలం ధమ్మపేటలోని ప్రభుత్వ ఆశ్రమ పాఠశాలలో అడ్మిషన్లు క్లోజ్ బోర్డు పెట్టారు. మొత్తం 400 సీట్లు నిండడంతో ఈ నిర్ణయం తీసుకున్నట్లు పాఠశాల ప్రధానోపాధ్యాయులు బద్రు తెలిపారు.

గతంలో 315 మంది విద్యార్థులు చదువుతుండగా, ప్రొఫెసర్ జయశంకర్ బడిబాట కార్యక్రమం ద్వారా ఇటీవల 85 మంది విద్యార్థులు కొత్తగా చేరినట్లు ఆయన వివరించారు. దీంతో అనుమతించబడ్డ గరిష్ట సంఖ్య 400 కి చేరుకుంది.

డిజిటల్ తరగతులు, సైన్స్ ల్యాబ్, లైబ్రరీ, కంప్యూటర్ శిక్షణ, క్రీడా సౌకర్యాలు వంటి ఆధునిక సదుపాయాలతో ఈ పాఠశాల ప్రభుత్వ బడులపై తల్లిదండ్రుల నమ్మకాన్ని పెంచుతోంది. పట్టణ ప్రాంతంలోని రవాణా సౌకర్యం, సీనియర్ ఉపాధ్యాయుల బోధన కూడా తోడ్పడిందని తల్లిదండ్రులు చెబుతున్నారు.