పూజా గదిలో గంట వాడకం: ఆగమ శాస్త్రం చెప్పే నియమాలు

దేవతారాధనలో గంటానాదం ఒక ముఖ్యమైన ఉపచారం. దీని వినియోగంలో ఆగమ శాస్త్రం కొన్ని ప్రత్యేక నియమాలు విధించింది.

శివారాధన చేసేవారు నందీశ్వరుడు కలిగిన గంటను మాత్రమే ఉపయోగించాలి. శ్రీమన్నారాయణ అర్చనకు గరుత్మంతుడు లేదా ఆంజనేయ స్వామి విగ్రహం ఉన్న గంటను వాడాలి. మహిళలు మాత్రం పై విగ్రహాలు ఉన్న గంటలను వినియోగించరాదు. వారికి చివర గుండ్రని బొడిపె ఉన్న గంటే స్వీకారార్హమని ఆగమం స్పష్టం చేస్తోంది.

గంటను నేలపై ఉంచకూడదు. ప్రత్యేకించి మూడు కాళ్ల పీట లేదా కొయ్య పీటపై ఉంచాలి. అర్చనా స్థలంలో శంఖం, గంట రెండింటినీ అలంకారంగా కొంత దూరంలో పెట్టుకోవాలి. పూజలో ఎన్ని లోటుపాట్లు ఉన్నా, శంఖం, గంట తప్పనిసరిగా ఉండవలసిన వస్తువులని శాస్త్రం నొక్కి చెబుతోంది.

గంటానాదం చేసే సమయంపైనా విధి నిబంధనలు ఉన్నాయి. ప్రారంభంలో, అభిషేక సమయంలో, నివేదన, హారతి, పవళింపు సేవ – ఈ ఐదు సందర్భాల్లో తప్పక మ్రోగించాలి. కానీ స్వామికి పుష్పాలంకరణ, పుష్పార్చన చేస్తున్నప్పుడు గంటానాదం చేయకూడదు. ఈ నాదం మనోబలాన్ని, ఆత్మశక్తిని పెంచుతుందని ఆగమ శాస్త్రం వివరిస్తోంది.