గోల్కొండ జగదాంబ మహంకాళి ఆలయంలో బోనాల ప్రారంభం

హైదరాబాద్‌లో ఆషాఢ మాసం ప్రారంభం కాగానే బోనాల వేడుకలు మొదలయ్యాయి. తొలి బోనం గోల్కొండ శ్రీ జగదాంబ మహంకాళి అమ్మవారి ఆలయంలో భక్తులు సమర్పించారు.

బోనం అంటే భోజనం అని నమ్ముతారు. భక్తులు అమ్మవారిని ఆడపడుచుగా భావించి, ఇంటికి ఆహ్వానించి బోనం అందిస్తారు. పసుపు కుంకుమ, పూలతో అలంకరించిన బోనాల్లో పసుపన్నం, బెల్లం అన్నం, పరమాన్నం వంటి పదార్థాలు అమ్మవారికి నైవేద్యంగా సమర్పిస్తారు. బోనంపై వెలిగించిన గండ దీపం ప్రత్యేక ఆకర్షణగా నిలుస్తుంది.

గోల్కొండ ఆలయంలో 300కు పైగా మెట్లు ఉన్నాయి. భక్తులు వాటిని అధిగమించి అమ్మవారికి బోనం చెల్లిస్తారు. ఈ ఆలయంలో జగదాంబ, మహంకాళి అనే ఇద్దరు అమ్మవార్లకు ప్రత్యేకంగా బోనాలు సమర్పించడం ఆనవాయితీ.

ప్రతి ఏటా ఆషాఢంలో హైదరాబాద్‌లో బోనాల వేడుకలు జరుగుతాయి. మిగతా జిల్లాల్లో శ్రావణ మాసంలో నిర్వహిస్తారు. ఈ సంవత్సరం వర్షాలు సకాలంలో రాకపోవడంతో సమృద్ధిగా వానలు పడాలని, రోగాలు రాకుండా కాపాడాలని భక్తులు ప్రార్థించారు.