అమర్నాథ్ మంచు శివలింగం త్వరగా కరిగిపోవడంతో యాత్ర ముందస్తుగా ముగిసే అవకాశం

జమ్మూ కాశ్మీర్ లోని అమర్నాథ్ గుహలో ఏటా సహజంగా ఏర్పడే మంచు శివలింగం ఈసారి త్వరగా కరిగిపోతోంది. దీంతో ఈ ఏడాది అమర్నాథ్ యాత్ర త్వరగా ముగిసే అవకాశం ఉందని ఆందోళన వ్యక్తమవుతోంది.

జూన్ 29వ తేదీన యాత్ర ప్రారంభమైన ఐదు రోజుల్లోనే శివలింగం భారీగా కరిగిపోయినట్టు సమాచారం. సముద్రమట్టానికి 3880 మీటర్ల ఎత్తున ఉన్న ఈ గుహలో సాధారణంగా 12 అడుగుల ఎత్తు వరకు శివలింగం సహజంగా ఏర్పడుతుంది. అయితే ఇటీవలి కాలంలో శివలింగం భారీగా కరిగిపోవడం తరచు జరుగుతోంది.

ప్రస్తుతం వేల మంది భక్తులు యాత్ర మార్గంలో ఉన్నారు. శివలింగం పూర్తిగా కరిగిపోకముందే దర్శనం చేసుకోవాలని వారు కోరుకుంటున్నారు. నిపుణులు మాత్రం వాతావరణ మార్పులే శివలింగం త్వరగా కరిగిపోవడానికి కారణమని చెబుతున్నారు. వాతావరణం అనుకూలిస్తే శివలింగం మళ్లీ పూర్తిస్థాయిలో రూపుదిద్దుకునే అవకాశం ఉంది.