వియత్నాం బోటు ప్రమాదం నుంచి క్షేమంగా తిరిగివచ్చిన బాధితులు శంషాబాద్‌కు చేరుకున్నారు

వియత్నాంలో జరిగిన బోటు ప్రమాదం నుంచి ప్రాణాలతో బయటపడిన భారతీయులు గురువారం శంషాబాద్ విమానాశ్రయానికి చేరుకున్నారు. వీరిలో ఆంధ్రప్రదేశ్, తెలంగాణ, కర్ణాటక, కేరళ, తమిళనాడు రాష్ట్రాల వారు ఉన్నారు.

బాధితులు మాట్లాడుతూ, తాము ప్రమాదం నుంచి బతికి బయటపడతామని ఊహించలేదని చెప్పారు. తమతో ప్రయాణించిన చాలా మంది ప్రాణాలు కోల్పోయారని ఆవేదన వ్యక్తం చేశారు.

ప్రమాదంపై ప్రధాన మంత్రి కార్యాలయం (PMO), ఆంధ్రప్రదేశ్, తెలంగాణ ప్రభుత్వాలు వేగంగా స్పందించడంతో తాము త్వరగా భారతదేశానికి తిరిగి రాగలిగామని వారు తెలిపారు. ప్రమాదం తర్వాత మరికొందరు వియత్నాంలో చికిత్స పొందుతున్నారు. మృతదేహాలను రాబోయే రెండు మూడు రోజుల్లో తీసుకు వచ్చేందుకు ప్రభుత్వం చర్యలు తీసుకుంటోందని ఒక బాధితుడు చెప్పారు.

మహబూబ్‌నగర్‌కు చెందిన మహమ్మద్ ముస్తదీర్ మాట్లాడుతూ, ప్రమాదం ఊహించనిదని, దాదాపు 50 శాతం మంది ప్రాణాలు కోల్పోయారని తెలిపారు. విజయవాడకు చెందిన మరో బాధితుడు వివరాలు ఇస్తూ, 80 నుంచి 100 మంది పర్యాటకులు రెండు మూడు బోట్లలో నీటి కార్యకలాపాలకు వెళ్లారని, తాను ఉన్న బోటులో 32 మంది ఉండగా, అందులో 24 మంది ఆంధ్రప్రదేశ్ వారని చెప్పారు. ఒక్కసారిగా వచ్చిన పెద్ద అలలకు బోటు తిరగడంతో ప్రమాదం జరిగిందని, లైఫ్ జాకెట్లు ఉన్నా మూసి ఉన్న బోటు కావడం వల్ల బయటకు రావడం కష్టమైందని వివరించారు. చాలా మందికి CPR ఇచ్చామని, కొందరిని ఆస్పత్రికి తరలించామని, అయినా కొందరు మృతి చెందారని చెప్పారు.