వియత్నాం దీవి సమీపంలో భారతీయ పర్యాటకుల బోటు బోల్తా: 34 మందిలో 15 రక్షణ, ఇద్దరి పరిస్థితి విషమం

వియత్నాంలోని ఒక ద్వీపం నుంచి మరో దీవికి వెళ్తున్న భారతీయ పర్యాటకుల బోటు అదుపు తప్పి బోల్తా పడిన ఘటనలో 15 మందిని సురక్షితంగా రక్షించగా, ఇద్దరు తీవ్రంగా గాయపడ్డారు. ఈ ఘటనలో మొత్తం 34 మంది ప్రమాదానికి గురయ్యారు. ఓ బాధితుడు చెప్పిన వివరాల ప్రకారం, ఆయా పర్యాటకులు ఒక కంపెనీ డిస్ట్రిబ్యూటర్లతో కలిసి ఏర్పాటు చేసిన పర్యటనలో భాగంగా వియత్నాం వెళ్లారు. మొత్తం 105 మంది ప్రయాణికులు మూడు బోట్లలో బయలుదేరారు. మొదటి దీవికి చేరుకున్న తర్వాత రెండో దీవి వైపు బయలుదేరిన తొలి బోటు కేవలం కిలోమీటర్ దూరం వెళ్లగానే ఒక్కసారిగా సమతుల్యం కోల్పోయి బోల్తా పడింది. ఆ బోటులో 34 మంది ఉండగా, వెంటనే స్థానిక రెస్క్యూ బృందాలు, భారత రాయబార కార్యాలయం స్పందించాయి. 15 మందిని తక్షణం రక్షించగా, మరికొందరు కాసేపు నీళ్లలో మునిగిపోయారు. ఇద్దరు తీవ్రంగా గాయపడడంతో అక్కడి ఆసుపత్రిలో చేర్చి చికిత్స అందిస్తున్నారు. మిగిలిన వారి ఆరోగ్యం నిలకడగా ఉన్నట్లు తెలుస్తోంది. ఘటన స్థలికి సంబంధించిన పూర్తి వివరాలు ఇంకా రావాల్సి ఉంది. కంపెనీ ప్రతినిధులు, బాధితుల కుటుంబ సభ్యులు అక్కడికి చేరుకుని పరిస్థితిని గమనిస్తున్నారు. స్థానిక అధికారులు దర్యాప్తు ప్రారంభించారు.