ఏపీ డిప్యూటీ సీఎం పవన్ కల్యాణ్‌కు భుజం శస్త్రచికిత్స విజయవంతం; మూడు రోజుల్లో డిశ్చార్జి

ఏపీ ఉప ముఖ్యమంత్రి పవన్ కల్యాణ్ ముంబైలోని కోకిలాబెన్ ధీరుభాయ్ అంబానీ హాస్పిటల్‌లో కుడి భుజానికి శస్త్రచికిత్స చేయించుకున్నారు. ఆర్థోస్కోపిక్ విధానంలో రొటేటర్ కఫ్ సర్జరీ చేసినట్లు వైద్యులు తెలిపారు. ఆపరేషన్ మూడున్నర గంటల పాటు జరిగింది.

వైద్యులు తనిఖీ చేయగా కుడి భుజం ఎముకలో గ్రేటర్ ట్యూబిరోసిటీ భాగంలో ఫ్రాక్చర్, రెండు ప్రధాన టెండాన్లు చిట్లినట్టు గుర్తించారు. శస్త్రచికిత్స విజయవంతమైందని, ప్రస్తుతం ఆయన ఆరోగ్యం నిలకడగా ఉందని వైద్యులు ప్రకటించారు. భుజం పూర్తిగా కోలుకోవడానికి నాలుగు నెలల సమయం పట్టొచ్చని అంచనా వేశారు.

ఏపీ ముఖ్యమంత్రి చంద్రబాబు నాయుడు హాస్పిటల్‌కు వెళ్లి పవన్ కల్యాణ్‌ను పరామర్శించారు. ఆయన ఆరోగ్య పరిస్థితి గురించి అడిగి తెలుసుకున్నారు. పూర్తి విశ్రాంతి తీసుకోవాలని సూచించినట్లు సీఎం తెలిపారు. పవన్ కల్యాణ్ రెండు లేదా మూడు రోజుల్లో డిశ్చార్జి అయ్యే అవకాశం ఉంది.

అభిమానులు చేయి పట్టుకొని లాగడం వల్లనే ఈ భుజం సమస్య వచ్చిందని పవన్ కల్యాణ్ గతంలో ఓ సమావేశంలో చెప్పారు. ఈ విషయాన్ని మే 15 నిర్వహించిన పార్టీ కార్యకర్తల సమావేశంలో ప్రస్తావించారు. ఆ సమావేశంలో భుజం నొప్పి గురించి వివరించారు. రెండో భుజానికి కూడా చిన్న సమస్య ఉన్నట్లు గుర్తించిన వైద్యులు, దాన్ని ఫిజియోథెరపీతోనే సరిచేయవచ్చని చెప్పారు.