సాయిబాబా ఆలయాల నిధుల వివాదంపై మంత్రి ఆనం రామనారాయణ రెడ్డి క్లారిటీ, భక్తుల మనోభావాలు దెబ్బతిన్నందుకు క్షమాపణ

షిర్డీ సాయిబాబా ఆలయాలకు నిధులు కేటాయించడం కుదరదని దేవాదాయ శాఖ మంత్రి ఆనం రామనారాయణ రెడ్డి ఇటీవల చేసిన వ్యాఖ్యలు వివాదాస్పదమయ్యాయి. ఈ నేపథ్యంలో మంత్రి ప్రెస్ స్టేట్మెంట్ విడుదల చేశారు. ఒక టీవీ చానల్‌తో ఫోన్‌లో మాట్లాడారు.

మంత్రి మాట్లాడుతూ, తాను వ్యక్తిగతంగా సాయిబాబా భక్తుడినని, భక్తుల మనోభావాలు దెబ్బతిన్నాయని భావిస్తే క్షమాపణలు కోరుతున్నానని చెప్పారు. టీటీడీ (శ్రీవాణి ట్రస్ట్) నిధులు కేవలం ఆగమ శాస్త్రం ప్రకారం వైదిక పూజా విధానాలు కలిగిన ఆలయాలకు మాత్రమే కేటాయిస్తామని స్పష్టం చేశారు. సాయిబాబా ఆలయాలు స్వయంగా ఏర్పాటు చేసుకున్న ప్రార్థనా మందిరాలని, వాటికి ప్రభుత్వ నిబంధనల ప్రకారం నిధులు ఇవ్వడం సాధ్యం కాదని వివరించారు.

తమ ప్రభుత్వం దేవాదాయ రంగంలో పెద్ద ఎత్తున సంస్కరణలు చేపడుతోందని, రాష్ట్ర వ్యాప్తంగా 800 కోట్ల రూపాయలతో 680 పురాతన దేవాలయాల పునర్నిర్మాణానికి ప్రణాళికలు సిద్ధం చేసి టెండర్లు పిలిచినట్లు తెలిపారు. ఆక్రమణలకు గురైన దేవాదాయ భూములను రక్షించేందుకు ప్రత్యేక చర్యలు తీసుకుంటామన్నారు.

భక్తుల విశ్వాసాన్ని గౌరవిస్తామని, తమ వ్యాఖ్యలను కొందరు వక్రీకరించారని మంత్రి తెలిపారు.