ఏపీ: 53.7% లోటు వర్షపాతం, ఎల్‌నినో కంట్రోల్ రూమ్ ఏర్పాటు

ఆంధ్రప్రదేశ్లో ఋతుపవనాల మందగమనం కారణంగా 53.7% లోటు వర్షపాతం నమోదైంది. దీంతో రాష్ట్ర ప్రభుత్వం 27 జిల్లాల్లో అత్యవసర కార్యాచరణ ప్రకటించింది.

వ్యవసాయ శాఖ మంత్రి కింజరాపు అచ్చెన్నాయుడు ఉన్నతస్థాయి అధికారులతో వెబినార్ నిర్వహించి పంటల రక్షణ, నేల తేమ సంరక్షణపై కీలక ఆదేశాలు ఇచ్చారు. 24 గంటలూ పనిచేసే ఎల్‌నినో కంట్రోల్ రూమ్ ఏర్పాటు చేయాలని సూచించారు.

తీవ్ర నీటి కొరత ఉన్న ప్రాంతాల్లో కరువును తట్టుకునే పంటలను మిషన్ మోడ్‌లో ప్రోత్సహించాలన్నారు. ఏపీ స్టేట్ సీడ్ డెవలప్మెంట్ కార్పొరేషన్, ఆచార్య ఎన్‌జీ రంగా వ్యవసాయ విశ్వవిద్యాలయం సంయుక్తంగా 14,078 క్వింటాళ్ల అత్యవసర ప్రత్యామ్నాయ విత్తనాలను రెండు దశల్లో సిద్ధం చేయనున్నాయి. అవసరమైన ప్రణాళికలు అమలు చేస్తామని మంత్రి తెలిపారు.

ప్రస్తుత కరువు పరిస్థితుల్లో రైతులు ఆందోళన చెందాల్సిన అవసరం లేదని, ప్రభుత్వం తమకు అండగా ఉంటుందని మంత్రి అచ్చెన్నాయుడు భరోసా ఇచ్చారు.