AP, దక్షిణ ఒడిషా తీరాలకు తుఫాను ముందస్తు హెచ్చరిక.. 17, 18 తేదీల్లో భారీ వర్షాలు

ఆగ్నేయ బంగాళాఖాతంలో వాయుగుండం కొనసాగుతోంది. ఈ నేపథ్యంలో ఆంధ్రప్రదేశ్, దక్షిణ ఒడిషా తీర ప్రాంతాలకు వాతావరణ శాఖ తుఫాను ముందస్తు హెచ్చరిక జారీ చేసింది.

ఈ వాయుగుండం గంటకు సుమారు 10 కిలోమీటర్ల వేగంతో ఉత్తర దిశగా కదులుతోంది. ప్రస్తుతం ఇది చెన్నైకు 840 కిలోమీటర్ల దూరంలో ఉంది. ఒడిషాలోని గోపాల్‌పూర్‌కు 1,130 కిలోమీటర్ల దూరంలో కేంద్రీకృతమై ఉంది.

ఈ వాయుగుండం తీవ్రత మరింత పెరిగే అవకాశం ఉంది. దక్షిణ మధ్య పశ్చిమ బంగాళాఖాతంలో ఇది తుఫానుగా బలపడవచ్చని వాతావరణ శాఖ అంచనా వేస్తోంది. తర్వాత రెండు రోజుల్లో ఉత్తర దిశగా కదిలే అవకాశం ఉంది. ప్రధానంగా ఉత్తరాంధ్ర తీరం, ఒడిషా ప్రాంతాలపై దీని ప్రభావం ఉంటుందని శాఖ తెలిపింది.

17, 18 తేదీల్లో ఉత్తరాంధ్ర, ఒడిషాలోని కొన్ని ప్రాంతాల్లో భారీ వర్షాలు కురిసే అవకాశం ఉంది. Doppler radar weather కేంద్రాల ద్వారా వాతావరణ శాఖ పరిస్థితిని నిరంతరం పరిశీలిస్తోంది. ప్రభుత్వానికి హెచ్చరికలు జారీ చేస్తోంది.