సస్పెండ్ CI నాగరాజు రిమాండ్ రిపోర్టులో కీలక అంశాలు: సాయి కృష్ణ కస్టోడియల్ డెత్ నిర్ధారణ

సస్పెండ్ అయిన CI నాగరాజు రిమాండ్ రిపోర్టులో స్పెషల్ ఇన్వెస్టిగేషన్ టీం పలు కీలక అంశాలను ప్రస్తావించింది. రౌడీ షీటర్ సాయి కృష్ణను కస్టడీలోనే హత్య చేసినట్లు SIT నిర్ధారించింది. సాయి కృష్ణ మృతదేహాన్ని పోలీస్ స్టేషన్ లోనే చూసినట్లు SI వాంగ్మూలం ఇచ్చినట్లు వివరించింది.

మే 6 నుంచి జూన్ 19 మధ్య కృష్ణలంక PS పరిధిలో ఈ ఘటన జరిగినట్లు గుర్తించారు. సాయి కృష్ణపై నాన్ బెయిలబుల్ వారెంట్లు పెండింగ్ లో ఉండటంతో అతన్ని కృష్ణలంక పోలీస్ స్టేషన్ కు తీసుకొచ్చారు. మే 6న టాస్క్ ఫోర్స్ పోలీసులు సాయి కృష్ణను CI కి అప్పగించి అతని ఫోన్ కూడా స్వాధీనం చేసుకున్నారు.

ఫ్లిప్కార్ట్ డెలివరీ బాయ్ వాంగ్మూలం ఈ కేసులో కీలకంగా మారింది. అతను పోలీస్ స్టేషన్ కు డెలివరీ చేయడానికి వెళ్ళినప్పుడు సాయి కృష్ణ అక్కడ ఉన్నట్లు గుర్తించాడు. మే 1 నుంచి జూన్ 1 వరకు నెల రోజుల CCTV ఫుటేజ్ మిస్ అయినట్లు SIT అధికారులు గుర్తించారు.

ఈ కేసులో మొత్తం 17 మంది సాక్షులను విచారించి వాంగ్మూలాలు నమోదు చేశారు. సాయి కృష్ణ మృతదేహాన్ని CI నాగరాజు మరికొందరు కలిసి మాయం చేసినట్లు అధికారులు రిమాండ్ రిపోర్టులో పేర్కొన్నారు. 10 గంటల విచారణలో నాగరాజు మృతదేహం ఎక్కడ ఉందో వెల్లడించలేదు.

మృతదేహాన్ని ఏం చేశారో తెలుసుకోవడానికి మరియు సహకరించిన వారిని గుర్తించడానికి నాగరాజును పోలీస్ కస్టడీకి ఇవ్వాలని SIT న్యాయమూర్తిని కోరింది. సాయి కృష్ణ తల్లి విజయలక్ష్మి ఫిర్యాదు ఆధారంగా దర్యాప్తు చేపట్టినట్లు SIT తెలిపింది.