కామాఖ్యా ఆలయంలో రజస్వల ఉత్సవం: తీర్థప్రసాదం, నమ్మకాలు, భారీ తరలింపు

అస్సాం రాష్ట్రం గౌహతిలోని కామాఖ్యాదేవి ఆలయంలో ప్రతి సంవత్సరం అంబుబాచీ మేళా సందర్భంగా దేవి రజస్వల అవుతారని భక్తులు విశ్వసిస్తారు. ఈ సమయంలో ఆలయాన్ని మూడు రోజుల పాటు మూసివేస్తారు.

దేవతా విగ్రహంపై తెల్లటి వస్త్రాన్ని కప్పుతారు. మూడు రోజుల తర్వాత ఆ వస్త్రం ఎరుపు రంగులోకి మారిపోతుంది. ఇది దేవి రజస్స్రావంగా భక్తులు భావిస్తారు.

ఈ ఎర్రటి వస్త్రాన్ని, ఆలయం నుంచి సేకరించిన ఎర్రని నీటిని తీర్థంగా, ప్రసాదంగా భక్తులకు పంచుతారు. సంతానలేమితో బాధపడేవారు, ఋతుక్రమ లోపాలున్న మహిళలు, ఆర్థిక ఇబ్బందులు, శత్రుబాధలు తొలగిపోతాయని విశ్వాసం. ప్రకృతి సమతుల్యతను పునరుద్ధరించే శక్తి ఈ తీర్థానికి ఉందని చెబుతారు.

ఈ నమ్మకంతో ప్రతి ఏడాది లక్షలాది భక్తులు గౌహతి చేరుకుంటారు. అయితే, ఇంత భారీగా జనం తరలిరావడంతో ఆలయ ప్రాంగణం వాణిజ్యీకరణ చెందిందని, భారీ క్యూలైన్లు భక్తులకు తీవ్ర ఇబ్బంది కలిగిస్తున్నాయని కొందరు భక్తులు ఆందోళన వ్యక్తం చేస్తున్నారు.