జమ్మూ కాశ్మీర్ భారత అంతర్గత వ్యవహారం: ఐరాసలో పాక్ వ్యాఖ్యలకు భారత్ ఘాటు సమాధానం

ఐక్యరాజ్యసమితి భద్రతా మండలిలో పాకిస్థాన్ ప్రతినిధి చేసిన అనుచిత వ్యాఖ్యలను భారత్ తీవ్రంగా ఖండించింది. జమ్మూ కాశ్మీర్ కేంద్రపాలిత ప్రాంతం పూర్తిగా భారత అంతర్గత వ్యవహారమని, అది ఎప్పటికీ భారత్‌లో భాగమేనని భారత ప్రతినిధి స్పష్టం చేశారు. భద్రతా మండలి సహాధ్యక్షుడిగా ఉన్న పాకిస్థాన్ ప్రతినిధి నిష్పక్షపాతంగా వ్యవహరించాల్సిన బదులు రాజకీయ ప్రసంగం చేయడం విచారకరమని ఆయన అన్నారు.

పాకిస్థాన్ తన మానవ హక్కుల ఉల్లంఘనల నుంచి దృష్టి మరల్చేందుకే ఇలాంటి వ్యాఖ్యలు చేస్తోందని భారత ప్రతినిధి ఎద్దేవా చేశారు. పాక్ ఆక్రమిత కాశ్మీర్‌లో కొనసాగుతున్న నిరసనలు, దశాబ్దాల ఆర్థిక దోపిడీ, ప్రాథమిక హక్కుల నిరాకరణ, పరిపాలనా అణచివేతలకు ప్రత్యక్ష ఫలితమని తెలిపారు. నిరాయుధ పౌరులపై పాక్ పోలీసులు కఠోర హింసకు పాల్పడడం, నిత్యావసరాలు, మందుల సరఫరా నిలిపివేయడం, ఇంటర్నెట్ సేవలు బంద్ చేయడం, ప్రాణాంతక బల ప్రయోగం చేయడంపై ఆయన ఆగ్రహం వ్యక్తం చేశారు. పలువురు ప్రాణాలు కోల్పోయిన విషయాన్ని కూడా ప్రస్తావించారు. పాకిస్థాన్ తన దుష్ప్రవర్తనకు జవాబుదారీగా ఉండాలని అంతర్జాతీయ సమాజాన్ని భారత్ కోరింది.

ఇదే సందర్భంగా భారత ప్రతినిధి చాప్టర్ 6, చాప్టర్ 7 మధ్య తేడాలను వివరించారు. శాంతి పునరుద్ధరణకు చాప్టర్ 7 కింద తక్షణ చర్యలు అవసరమని, చాప్టర్ 6 లోని మధ్యవర్తిత్వ విధానాలు శాశ్వతం కాదని, మారిన పరిస్థితులకు అనుగుణంగా సమీక్షించాల్సిన అవసరం ఉందని సూచించారు. దీర్ఘకాలంగా పెండింగ్‌లో ఉన్న పాలస్తీనా సమస్యను ఉదాహరణగా పేర్కొంటూ, పాత మధ్యవర్తిత్వ నమూనాలను కాలానుగుణంగా మార్చుకోవాల్సిన అవసరాన్ని నొక్కి చెప్పారు.