మహిళలు ఒకరికొకరు సహాయం చేస్తూ ముందుకు సాగాలి: రిటైర్డ్ IAS కే. రత్నప్రభ

హైదరాబాద్‌లో 'వేటా ఇండియా ఉమెన్ ఎంపవర్‌మెంట్ తెలుగు అసోసియేషన్' ప్రారంభోత్సవం జరిగింది. ఈ కార్యక్రమంలో మాజీ ఐఏఎస్ అధికారిణి, కర్ణాటక మాజీ ప్రధాన కార్యదర్శి కే. రత్నప్రభ ముఖ్య అతిథిగా పాల్గొన్నారు.

ఈ సందర్భంగా ఆమె మాట్లాడుతూ, ప్రతి మహిళ జీవితం ఒక ఆసక్తికరమైన ప్రయాణమని అన్నారు. మహిళా సాధికారతకు ప్రస్తుత తరం చాలా అదృష్టవంతమైనదని, తను 1981లో సర్వీసులో చేరినపుడు రాష్ట్రంలో ఒకే ఒక్క మహిళా అధికారిణిగా ఉండేదని గుర్తు చేశారు.

తన విజయానికి తల్లి ప్రోత్సాహమే కారణమని ఆమె వెల్లడించారు. తల్లి 1947లో తొలి డాక్టర్‌గా ఉండి, తనను చదువు, క్రీడల్లో ముందుకు నడిపించారని చెప్పారు. ఈ మద్దతుతోనే తాను టేబుల్ టెన్నిస్‌లో జాతీయ స్థాయి క్రీడాకారిణిగా ఎదిగానని అన్నారు.

మహిళలు ఒకరికొకరు సహాయం చేసుకుంటూ గొలుసు ఏర్పాటు చేయాలని ఆమె సూచించారు. ప్రతి ఒక్క మహిళా కనీసం 10 నుంచి 15 మంది ఇతర మహిళలకు మద్దతు ఇవ్వాలని పిలుపునిచ్చారు. మహిళలు సమాజంలో పోటీపడేందుకు సమయ నిర్వహణ, వ్యక్తిగత నిర్వహణ అవసరమని తెలిపారు.

యువతులు ఎప్పుడూ నిరుత్సాహానికి గురి కాకుండా ఓపికతో, సానుకూల దృక్పథంతో ఉండాలని ఆమె సూచించారు. తల్లులు తమ కూతుళ్లను నిజమైన వజ్రాలుగా తీర్చిదిద్దాలని, వారి కలలను సాధించడంలో సహాయం చేయాలని ఉద్బోధించారు.