విజయవాడ గాడే సాయి కృష్ణ మిస్సింగ్ కేసు: అడ్వకేట్ ఇమ్మనేని రామారావు NHRC లో పిటిషన్

విజయవాడలో సంచలనం రేపుతున్న గాడే సాయి కృష్ణ మిస్సింగ్ కేసులో అడ్వకేట్ ఇమ్మనేని రామారావు జాతీయ మానవ హక్కుల కమిషన్ (NHRC) లో పిటిషన్ దాఖలు చేశారు. ఈ కేసులో ఇప్పటికే సిఐ పై కేసు నమోదైంది. త్వరలోనే అరెస్ట్ కూడా జరుగుతుందని సమాచారం.

బాధిత కుటుంబ సభ్యులు తీవ్రమైన ఆరోపణలు చేస్తున్నారు. సాయి కృష్ణను పోలీసులు తీసుకెళ్ళి చంపేసి, అతని మృతదేహాన్ని కాల్చి బూడిదను చెరువులో పడేశారని కుటుంబం ఆరోపిస్తోంది. ఆంధ్రప్రదేశ్ హైకోర్టులో హెబియస్ కార్పస్ పిటిషన్ కూడా దాఖలు అయింది.

అడ్వకేట్ రామారావు మాట్లాడుతూ, రౌడీ షీటర్ అయినంత మాత్రాన పోలీసులు ఒక వ్యక్తిని చంపే హక్కు వారికి లేదని స్పష్టం చేశారు. మన న్యాయ వ్యవస్థలో నేరం నిరూపణ అయ్యే వరకు ఏ వ్యక్తిని కూడా నేరస్తుడిగా పరిగణించకూడదని చట్టం చెబుతోందని ఆయన అన్నారు.

తమిళనాడులో కస్టోడియల్ డెత్ కేసులో తొమ్మిది మంది పోలీసులకు ఉరిశిక్ష విధించిన తీర్పును ఆయన ప్రస్తావించారు. ఇదే తరహా తీవ్రమైన చర్యలు ఇక్కడ కూడా జరగాలని డిమాండ్ చేశారు.

కేసులో తాను NHRC కి చేసిన విన్నపంలో ముఖ్యమైన అంశాలు పేర్కొన్నారు. సిఐ మరియు స్టాఫ్ పై వెంటనే చర్యలు తీసుకోవాలని, పోలీసు స్టేషన్ పరిసరాల్లో CCTV ఫుటేజీలను భద్రపరచాలని కోరారు. రాజకీయ కారణాలు ఉన్నాయని ఆరోపణలు వస్తున్న నేపథ్యంలో దర్యాప్తును CBI కి అప్పగించాలని కూడా తాను కోరినట్లు చెప్పారు.

Justice రామ సుబ్రహ్మణ్యం నేతృత్వంలో పనిచేస్తున్న జాతీయ మానవ హక్కుల కమిషన్ ఈ కేసులో తప్పకుండా జోక్యం చేసుకుంటుందని అడ్వకేట్ రామారావు విశ్వాసం వ్యక్తం చేశారు. దోషులు ఎంత పెద్దవాళ్ళైనా చట్టం నుంచి తప్పించుకోకూడదని, పారదర్శకమైన దర్యాప్తు జరగాలని ఆయన పేర్కొన్నారు.