అరుణాచల్ భారీ వర్షాలతో అస్సాంలో తీవ్ర వరద హెచ్చరిక

అరుణాచల్ ప్రదేశ్‌లో కురుస్తున్న భారీ వర్షాల కారణంగా బ్రహ్మపుత్ర నది, దాని ఉపనదులు ఉప్పొంగాయి. దీంతో అస్సాంలోని లోతట్టు ప్రాంతాలు, రోడ్లు నీట మునిగాయి. ప్రజలు ఇళ్ల నుంచి బయటకు రాలేని పరిస్థితి ఏర్పడింది.

అస్సాం ప్రభుత్వం ధేమాజి, లఖీంపూర్, విశ్వనాథ్, సోనిత్పూర్ జిల్లాలకు హై అలర్ట్ జారీ చేసింది. ప్రజలు ఇళ్ల నుంచి బయటకు రావద్దని హెచ్చరించింది. రెస్క్యూ బృందాలను అప్రమత్తం చేసింది.

కేమీ నది వరద ఉధృతికి 300 మీటర్ల ఇనుప వంతెన కొట్టుకుపోయింది. దీంతో పలు ప్రాంతాలకు రాకపోకలు నిలిచిపోయాయి.

భారత వాతావరణ శాఖ (IMD) అరుణాచల్ ప్రదేశ్ లో మరో రెండు మూడు రోజులు భారీ నుంచి అతి భారీ వర్షాలు కురిసే అవకాశం ఉందని తెలిపింది. దీని ప్రభావంతో అస్సాంలో వరద పరిస్థితి మరింత తీవ్రమయ్యే అవకాశం ఉంది.

ప్రస్తుతం అస్సాంలో జనజీవనం స్తంభించింది. లోతట్టు ప్రాంతాల ప్రజలు సురక్షిత ప్రాంతాలకు తరలిస్తున్నారు. ప్రభుత్వం సహాయక చర్యలు కొనసాగిస్తోంది.