పవన్ అభిమాని నిరంజన్‌కు నిర్మాత బండ్ల గణేష్ రూ.5 లక్షల ఆర్థిక సాయం

హనుమకొండలో ప్రాణాంతక వ్యాధితో బాధపడుతున్న పవన్ కళ్యాణ్ అభిమాని నిరంజన్‌ను నిర్మాత బండ్ల గణేష్ పరామర్శించారు. నిరంజన్ నివాసానికి వెళ్లిన ఆయన బాలుడి ఆరోగ్య పరిస్థితిని అడిగి తెలుసుకున్నారు.

బండ్ల గణేష్ తన పరమేశ్వర ఆర్ట్స్ ప్రొడక్షన్స్ బ్యానర్ తరపున నిరంజన్ తల్లిదండ్రులకు రూ.5 లక్షల చెక్కు అందజేశారు. ఈ నెల 17న డిప్యూటీ సీఎం పవన్ కళ్యాణ్ నిరంజన్‌ను పరామర్శించి రూ.1 లక్ష సాయం అందించారు. ఆయన పర్యటన ద్వారానే ఈ విషయం తన దృష్టికి వచ్చిందని బండ్ల గణేష్ తెలిపారు.

నారా భువనేశ్వరి జన్మదినం రోజున రూ.5 లక్షలు అందజేయడం సంతోషంగా ఉందని, బాలుడు త్వరగా కోలుకోవాలని మనస్ఫూర్తిగా కోరుకుంటున్నట్టు బండ్ల గణేష్ తెలిపారు. కారు కొనుక్కోవాలన్న నిరంజన్ కోరికను గుర్తుచేస్తూ, ఈ డబ్బుతో కారు కొనుక్కుని బాలుడిని తిప్పాలని ఆయన తండ్రికి సూచించారు.

పవన్ కళ్యాణ్ అభిమానుల నుంచి నిరంజన్ కుటుంబానికి అన్ని విధాల సహకారం లభిస్తుందని బండ్ల గణేష్ భరోసా ఇచ్చారు.