భద్రాచలం ఆలయ అభివృద్ధి పనులు ప్రారంభం; తొలి దశ 200 కోట్లు

దక్షిణ అయోధ్యగా పిలిచే భద్రాచలం రామాలయంలో అభివృద్ధి పనులు ఇవాళ ప్రారంభమయ్యాయి. తొలి విడతలో 200 కోట్ల రూపాయలతో నిర్మాణం చేపట్టారు. గోదావరి నది ఒడ్డున ఉన్న ఈ ఆలయంలో పురాతన భవనాలు కూల్చివేతతో పాటు నిర్మాణ పనులు మొదలయ్యాయి.

వచ్చే ఏడాది జూలైలో గోదావరి పుష్కరాల నాటికి ఈ మొదటి దశ పనులు పూర్తి చేయాలని తెలంగాణ ప్రభుత్వం లక్ష్యం పెట్టుకుంది. ఇప్పటికే టెండర్లు ద్వారా కాంట్రాక్టర్లను ఎంపిక చేశారు. కాంప్లెక్స్ విస్తరణ అంచనాలను 200 కోట్లకు సవరించి, ఆ పనులకు టెండర్ ఖరారు అయ్యింది. ఇతర పనులకు టెండర్లు పిలవాల్సి ఉంది.

586 కోట్ల రూపాయల మాస్టర్ ప్లాన్ రూపొందించారు. దీనిలో మూడు విడతలు ఉన్నాయి. మొదటి దశలో కాంప్లెక్స్ విస్తరణకు 180 కోట్లు, పరిసర ప్రాంతాల అభివృద్ధికి 96 కోట్లు, మొత్తం 351 కోట్ల పనులు 2027 నాటికి పూర్తి చేయాలి. రెండో విడతలో ఆరు ఎకరాల స్థలంలో పార్కింగ్, ఇతర సౌకర్యాల కోసం 108 కోట్లతో 2028 నాటికి, మూడో విడతలో భద్రాచలం టెంపుల్ టౌన్ అభివృద్ధికి 127 కోట్లతో 2029 నాటికి పనులు పూర్తవుతాయి.

16వ శతాబ్దంలో భక్త రామదాసు నిర్మించిన ఈ రామాలయానికి 1960లో గోపురం నిర్మాణం మినహా పెద్దగా అభివృద్ధి జరగలేదు. భక్తుల రద్దీ పెరగడంతో ఆలయాన్ని విస్తరించాలని ప్రభుత్వం నిర్ణయించింది. ప్రధానాలయంలో ఎలాంటి మార్పులు జరగకపోవడంతో భక్తుల దర్శనానికి ఆటంకం లేదని ఆలయ అధికారులు తెలిపారు.