భగవంత్ మాన్ వీడియో ఫోర్జరీ కేసు: ఇద్దరు నిందితులకు 8 రోజుల పోలీసు కస్టడీ

పంజాబ్ ముఖ్యమంత్రి భగవంత్ మాన్‌కు సంబంధించిన వీడియో ఫోర్జరీ కేసులో ఇద్దరు నిందితులు అంకిత్, అరుణ్‌లను గురుగ్రామ్ కోర్టు 8 రోజుల పోలీసు కస్టడీకి పంపింది. డిజిటల్ ఫోరెన్సిక్ నివేదికను ఫోర్జరీ చేశారన్న ఆరోపణలపై వీరిని గురుగ్రామ్ పోలీసులు అరెస్టు చేశారు. ఈ నివేదికను అకాల్ తక్త్‌కు సమర్పించేందుకు సిద్ధం చేస్తున్నారు. ఇటీవల సోషల్ మీడియాలో వైరల్ అయిన ఓ వీడియోలో పంజాబ్ సీఎం భగవంత్ మాన్ పంజాబ్ గురువులను అగౌరవపరిచినట్లు ఆరోపణలు వచ్చాయి. ఈ వీడియో నిజమైనదా, AI జనరేటెడా అనే వివాదం నడుస్తోంది. నిందితులు అంకిత్, అరుణ్‌లు పంజాబ్ ప్రభుత్వ సీనియర్ అధికారులతో జూన్ 15, 16 తేదీల్లో గురుగ్రామ్‌లోని క్రౌన్ ప్లాజా హోటల్‌లో సమావేశమయ్యారని, ఆ సమయంలో లూథియానా పోలీస్ కమిషనర్ స్వపన్, ఎస్పీ జశన్‌బీర్ సింగ్ కూడా ఉన్నట్లు రిపబ్లిక్ కథనం వెల్లడించింది. ఫోరెన్సిక్ నిపుణుడు జస్‌ప్రీత్ సింగ్ ఫిర్యాదు మేరకు ఈ కేసు నమోదైంది. భగవంత్ మాన్‌కు అనుకూలంగా నకిలీ నివేదిక తయారు చేయాలని తనను సంప్రదించారని, అందుకు నిరాకరించినట్లు జస్‌ప్రీత్ తెలిపాడు. అకాల్ తఖ్త్ ఈ వీడియో ఫోరెన్సిక్ పరీక్ష చేయించగా వీడియో AI జనరేటెడ్ కాదని, నిజమైనదేనని నిర్ధారణ అయింది. దీంతో భగవంత్ మాన్‌పై తీవ్ర విమర్శలు వచ్చాయి. BJP నేత మంజిందర్ సింగ్ సిర్సా ఈ వ్యవహారంలో ప్రమేయం ఉన్న పోలీసు అధికారులపై కఠిన చర్యలు తీసుకోవాలని డిమాండ్ చేశారు.