తల్లిదండ్రుల సందేశం కోసం బీహార్ యువకుడి 35,000 కి.మీ. కాలినడక యాత్ర

బీహార్‌లోని నలందా జిల్లా బీహార్ షరీఫ్ ప్రాంతానికి చెందిన 26 ఏళ్ల అభిరామ్ కుమార్ చెప్పులు లేకుండా 35,000 కిలోమీటర్ల పాదయాత్ర చేపట్టారు. వృద్ధాప్యంలో తల్లిదండ్రులను నిర్లక్ష్యం చేయకూడదని సమాజానికి సందేశం ఇవ్వడమే ఆయన లక్ష్యం.

ఈ యాత్ర సుమారు మూడు నుంచి మూడున్నర సంవత్సరాల పాటు కొనసాగుతుంది. చార్‌ధామ్ క్షేత్రాలైన బద్రీనాథ్, ద్వారక, పూరి, రామేశ్వరంతో పాటు సోమనాథ్, మహాకాళేశ్వర్, కేదార్‌నాథ్, కాశీ విశ్వనాథ్, త్రయంబకేశ్వర్ తదితర ద్వాదశ జ్యోతిర్లింగాలను ఆయన కాలినడకన సందర్శించనున్నారు. చివరగా కైలాస మానస సరోవర యాత్రతో ఈ పాదయాత్ర ముగుస్తుంది.

ఇప్పటివరకు 106 రోజులు నిరంతరాయంగా నడిచిన అభిరామ్ కుమార్ ఒడిశా రాజధాని భువనేశ్వర్ చేరుకున్నారు. అక్కడి నుంచి పూరి జగన్నాథ ఆలయానికి పయనమయ్యారు. యాత్ర మొదట్లో చెప్పులు లేకుండా నడవడం వల్ల పాదాల్లో తీవ్ర నొప్పి వచ్చిందని ఆయన చెప్పారు. జగన్నాథుడి నామస్మరణే తనను ముందుకు నడిపించిందని తెలిపారు. దారిలో కలిసే ప్రతి ఒక్కరికి కన్నవారి పట్ల ఉన్న బాధ్యతను గుర్తు చేస్తున్నారు. అపరిచితులు అనేక మంది ఆయనకు భోజనం, వసతి కల్పిస్తున్నారు.

అభిరామ్ కుమార్ దివంగత మనోహర్‌లాల్, రాణిదేవి దంపతుల కుమారుడు. ఆయన ఇంటర్మీడియట్ వరకు చదువుకున్నారు. పిల్లల భవిష్యత్తు కోసం జీవితాంతం కష్టపడే తల్లిదండ్రులను వృద్ధాప్యంలో అనాథలుగా వదిలేయకూడదని ఆయన చెప్తున్నారు. తల్లిదండ్రులకు మనం ఇచ్చే అసలైన ఆస్తి డబ్బు కాదని, అవసరమైన సమయంలో ఇచ్చే సమయం, ప్రేమ, గౌరవమే అని ఆయన అంటున్నారు.

ఈ 35,000 కిలోమీటర్ల పాదయాత్ర పూర్తయిన తర్వాత కుటుంబ ఆదరణ లేని వృద్ధుల కోసం స్వగ్రామంలో ఉచిత వృద్ధాశ్రమం ఏర్పాటు చేయాలని అభిరామ్ కుమార్ లక్ష్యంగా పెట్టుకున్నారు.