కోనసీమలో నదీ కోత ఉధృతం: లంక గ్రామాలపై ముప్పు, గ్రోయిన్లు కోరుతున్న రైతులు

కోనసీమ జిల్లాలో వరుస తుఫానుల ప్రభావంతో గోదావరి తీర ప్రాంతాల్లో నదీ కోత తీవ్రమవుతోంది. మామిడికుదురు మండలం పరిధిలో వైనతేయం నది తీరంలో భూమి కోత పెరిగింది. సారవంతమైన వ్యవసాయ భూములు, కొబ్బరి తోటలు నది గర్భంలో కలిసిపోతున్నాయి.

తుఫాన్ల సమయంలో నది ఉదృతంగా ప్రవహిస్తోంది. సముద్రపు అలల ప్రభావం కూడా తోడవడంతో ఒడ్డు భూమి భారీగా కోతకు గురవుతోంది. నది వడ్డున ఉన్న కొబ్బరి చెట్లు వేళ్లతో సహా కొట్టుకుపోతున్నాయి. కొన్ని చోట్ల మట్టికోత పెరిగి తోటలు, పంట భూములు కనుమరుగయ్యాయి.

రాజోలు దీవిలో మూడు వైపులా గోదావరి, ఒక వైపు సముద్రం ఉంది. పౌర్ణమి, అమావాస్యలకు గోదావరి అటుపోట్లతో లంక భూములు మునిగిపోతున్నాయి. మామిడికుదురు మండలంలోని అప్పనపల్లి, పాసర్లపూడి, బి. దొడ్డవరం, పెదపట్నం, పెదపట్నం లంక, పాసర్లపూడి లంక, లూటుకుర్రు, అదుర్రు గ్రామాలపై నదీ కోత ముప్పు ఉందని స్థానికులు ఆందోళన వ్యక్తం చేస్తున్నారు.

నదీ కోత అరికట్టకపోతే గ్రామాల ఉనికికే ముప్పు ఉంటుందని రైతులు చెబుతున్నారు. గతంలో కొబ్బరి రైతులు బి. దొడ్డవరం, పాసర్లపూడి గ్రామాల నుంచి స్థానిక ఎమ్మెల్యే, ఎంపీ, కలెక్టర్‌ను కలిసి తమ బాధను విన్నవించారని తెలిపారు. శాశ్వత పరిష్కారం దిశగా చర్యలు కనిపించడం లేదని ఆవేదన వ్యక్తం చేస్తున్నారు.

నదీ కోత తీవ్రత ఉన్న ప్రాంతాలను గుర్తించాలని కోరుతున్నారు. అక్కడ రక్షణ గోడలు, గ్రోయిన్లు, రివెట్‌మెంట్లు, అవసరమైన చోట రాతి కట్టడాలు ఏర్పాటు చేయాలని విజ్ఞప్తి చేస్తున్నారు. అధికారులు, ప్రజా ప్రతినిధులు క్షేత్ర స్థాయిలో పరిశీలించాలని రైతులు కోరుతున్నారు.