ఢిల్లీలో వాయు కాలుష్యం తీవ్రం: AQI 370 దాటి వెరీ పూర్ కేటగిరీలో కొనసాగుతోంది

దేశ రాజధాని ఢిల్లీలో వాయు కాలుష్యం తీవ్రంగా ఉంది. నగరంలో గాలి నాణ్యత సూచిక (AQI) 300 నుంచి 385 మధ్య నమోదవుతోంది. దీంతో ఢిల్లీ వెరీ పూర్ కేటగిరీలో కొనసాగుతోంది. గత 20 రోజులుగా ఇదే పరిస్థితి కనిపిస్తోంది.

అనంద్ విహార్ ప్రాంతంలో ఉదయం 6:30 గంటలకు AQI 371గా నమోదైంది. నిన్న కొంత మెరుగుపడినా, ఈరోజు మళ్లీ 370 మార్కును దాటింది. దీపావళి తర్వాత కాలుష్యం మరింత పెరిగింది. ఉదయం, సాయంత్రం వేళల్లో పొగమంచును తలపించే కాలుష్య మేఘాలు నగరాన్ని కమ్మేస్తున్నాయి.

చలికాలం మొదలవడం, ఉష్ణోగ్రతలు తగ్గడం, గాలుల వేగం మందగించడం వల్ల కాలుష్య కారకాలు వాతావరణంలోనే నిలిచిపోతున్నాయి. వాహనాల పొగ, పరిశ్రమల ఉద్గారాలు, నిర్మాణ పనుల దుమ్ము కాలుష్యాన్ని పెంచుతున్నాయి. పంట వ్యర్థాల దహనం, దీపావళి టపాకాయల ప్రభావం కూడా తోడవుతోంది. గాలిలో PM2.5, PM10 సూక్ష్మ కణాల సాంద్రత పెరగడం ప్రమాదకరంగా మారింది.

కాలుష్యాన్ని నియంత్రించేందుకు GRAP-3 నిబంధనలు అమలులో ఉన్నాయి. ఎలక్ట్రిక్, CNG, BS-VI వాహనాలు తప్ప మిగిలిన వాహనాలను ఢిల్లీ NCRలోకి అనుమతించడం లేదు. ఇతర రాష్ట్రాల నుంచి వచ్చే డీజిల్ వాహనాలను ఢిల్లీ సరిహద్దులోనే నిలిపివేస్తున్నారు. కట్టెలు, ఇతర ఇంధనాల వినియోగంపై నిషేధం విధించారు. పాత భవనాల కూల్చివేతలపై కూడా నిషేధం ఉంది.

IIT కాన్పూర్ శాస్త్రవేత్తల సహకారంతో cloud seeding ద్వారా కృత్రిమ వర్షం కురిపించి కాలుష్యాన్ని తగ్గించే అవకాశాలను ప్రభుత్వం పరిశీలిస్తోంది. హైబ్రిడ్ తరగతులు, వాహనాల రాకపోకలపై ఆంక్షలు కూడా పరిశీలనలో ఉన్నాయి. ట్యాంకర్లతో రోడ్లపై నీరు చల్లుతున్నా పరిస్థితి మెరుగుపడలేదు.

చిన్న పిల్లలు, వృద్ధులు, శ్వాసకోశ వ్యాధిగ్రస్తులు జాగ్రత్తలు పాటించాలని వైద్య నిపుణులు సూచిస్తున్నారు. బయటికి వెళ్లాల్సి వస్తే N95 మాస్క్ ధరించాలని ఢిల్లీ అధికారులు చెప్తున్నారు. వ్యక్తిగత వాహనాలకు బదులు మెట్రో, బస్సుల వంటి ప్రజా రవాణా వ్యవస్థను ఉపయోగించాలని కూడా కోరుతున్నారు.