హైదరాబాద్‌లో IVF సెంటర్ల అండాల సేకరణపై పోలీసుల దర్యాప్తు

హైదరాబాద్‌లో IVF కేంద్రాల్లో అండాల సేకరణపై పోలీసులు దర్యాప్తు చేపట్టారు. ఈ కేంద్రాల్లో వైద్యులు, మధ్యవర్తుల పాత్రపై విచారణ జరుపుతున్నారు.

దర్యాప్తులో కొన్ని అంశాలు వెల్లడయ్యాయి. యువతుల నుంచి బలవంతంగా అండాలు సేకరిస్తున్నట్టు పోలీసులు గుర్తించారు. ఒకే యువతి నుంచి పదే పదే అండాలు సేకరించినట్టు తేలింది. వర్కింగ్ ఉమెన్స్ హాస్టళ్ల ముసుగులో ఈ సేకరణ జరిగినట్టు దర్యాప్తులో తేలింది.

పశ్చిమ బెంగాల్, ఉత్తరప్రదేశ్, బీహార్, ఒడిశా నుంచి యువతులను హైదరాబాద్‌లో ఉద్యోగాలు ఇస్తామని చెప్పి తీసుకొచ్చినట్టు సమాచారం. వారి అసలు ఆధార్ కార్డులకు బదులు నకిలీ ఆధార్ కార్డులు వాడినట్టు పోలీసుల దర్యాప్తులో తేలింది. దీనివల్ల ఒకే మహిళ నుంచి మళ్లీ మళ్లీ అండాలు సేకరించడం సాధ్యమైంది.

ఇలా పదే పదే అండాలు సేకరించడం ART Act 2021 నిబంధనలకు విరుద్ధమని అధికారులు చెప్తున్నారు. దీనివల్ల మహిళలకు తీవ్ర ఆరోగ్య సమస్యలు వస్తాయని వారు పేర్కొంటున్నారు. ఇతర రాష్ట్రాలే కాకుండా విదేశాలకూ అండాలు పంపుతున్నట్టు అనుమానాలు ఉన్నాయని తెలుస్తోంది. ఈ వ్యవహారంలోని కొందరిపై పోలీసులు కేసులు నమోదు చేయడం లేదని మహిళా కమిషన్ అభిప్రాయపడింది.

వైద్య ఆరోగ్య శాఖ 27 ART కేంద్రాల్లో తనిఖీలు చేపట్టింది. ఏడు ఆసుపత్రుల్లో నిబంధనల ఉల్లంఘన జరిగినట్టు గుర్తించారు. మరో 20 ఫెర్టిలిటీ కేంద్రాలకు నోటీసులు జారీ చేశారు. ఈ కేసులో నిందితులను పోలీసులు ఐదు రోజుల కస్టడీకి తీసుకున్నారు. పూర్తి స్థాయిలో దర్యాప్తు కొనసాగుతోంది.