శ్రీ సత్యసాయి జిల్లాలో బాలికపై రాళ్ల దాడి, వృద్ధురాలు అదుపులో

శ్రీ సత్యసాయి జిల్లాలోని పరిగి మండలం ఊటుకూరు గ్రామంలో బాలికపై వృద్ధురాలు రాయితో దాడి చేసింది. తలకు బలమైన గాయాలు కావడంతో బాలిక అనంతపురం ఆసుపత్రిలో చికిత్స పొందుతోంది. పోలీసులు వృద్ధురాలిని అదుపులోకి తీసుకున్నారు.

సమాచారం ప్రకారం, నిన్న మధ్యాహ్నం బాలిక స్నేహితురాలితో కలిసి ఇంటి సమీపంలో ఆడుకుంటూ జామ చెట్టు వద్దకు వెళ్లింది. జామకాయలు కోస్తుండగా అక్కడ ఉన్న వృద్ధురాలు ఆమెపై రాయితో దాడి చేసింది. దాడిలో బాలిక అపస్మారక స్థితిలోకి వెళ్లిపోయింది.

అనంతరం వృద్ధురాలు బాలికను ఇంట్లో మంచం వెనుక దాచి లోపలికి వెళ్లిపోయింది. బాలిక కనిపించకపోవడంతో తల్లి ఆమె కోసం వెతకడం మొదలుపెట్టింది. మంచం వెనుక పడి ఉన్న బాలికను గుర్తించి ఆసుపత్రికి తీసుకెళ్లారు.

తొలుత హిందూపురం ఆసుపత్రిలో చికిత్స అందించారు. పరిస్థితి విషమంగా ఉండటంతో మెరుగైన చికిత్స కోసం అనంతపురం ఆసుపత్రికి తరలించారు. 12 గంటలు గడిచిన తర్వాతే పరిస్థితిపై చెప్పగలమని వైద్యులు చెబుతున్నట్టు బంధువులు తెలిపారు.

ఘటనలో సరిగ్గా ఏం జరిగిందనేది తమకు తెలియదని ఓ బంధువు అన్నారు. ఆమెపై కేసు నమోదు చేసి దర్యాప్తు చేస్తున్నట్టు పోలీసులు తెలిపారు.