మల్లికార్జున్ ఖర్గే, ప్రియాంక్ ఖర్గేలపై భూ కబ్జా ఆరోపణలు: BJP ప్రతినిధి

Congress పార్టీ అధ్యక్షుడు మల్లికార్జున్ ఖర్గే, కర్నాటక మంత్రి ప్రియాంక్ ఖర్గేలు తమ కుటుంబ ట్రస్టు ద్వారా ప్రభుత్వ భూమిని కబ్జా చేశారని BJP ప్రతినిధి ప్రదీప్ భండారీ తీవ్ర ఆరోపణలు చేశారు. ఖర్గే కుటుంబ సభ్యులతో నడిచే సిద్ధార్థ్ విహార ట్రస్టుకు ఎలాంటి అనుభవం లేకపోయినా, ప్రభుత్వం విలువైన భూములను కేటాయించిందని ఆయన ఆరోపించారు.

భండారీ వెల్లడించిన వివరాల ప్రకారం, 2024లో కర్నాటక ఇండస్ట్రియల్ ఏరియా డెవలప్‌మెంట్ బోర్డు (KIADB) బెంగళూరు సమీపంలోని 5 ఎకరాల ప్రభుత్వ భూమిని సిద్ధార్థ్ విహార ట్రస్టుకు ఏరోస్పేస్, రక్షణ రంగాల్లో పరిశోధన చేసేందుకు కేటాయించింది. ఆ సమయంలో కర్నాటకలో కాంగ్రెస్ ప్రభుత్వం అధికారంలో ఉంది, ట్రస్టులో మల్లికార్జున్ ఖర్గే, ప్రియాంక్ ఖర్గే, వారి కుటుంబ సభ్యులు సభ్యులు. ఈ భూమి మార్కెట్ విలువ సుమారు రూ.100 కోట్లు ఉంటుందని భండారీ పేర్కొన్నారు. ట్రస్టుకు ఏరోస్పేస్ రంగంలో ఎలాంటి గత అనుభవం లేదని, నిజమైన పరిశోధన కంపెనీలకు బదులు కాంగ్రెస్ అధ్యక్షుని కుటుంబ ట్రస్టుకు భూమి ఇవ్వడం అనుమానాస్పదంగా ఉందని ఆరోపించారు.

రెండో ఆరోపణలో, 2016లో గుల్బర్గా జిల్లాలో 19 ఎకరాల భూమిని అదే ట్రస్టుకు పాళి భాష పరిశోధన పేరుతో కేటాయించారని, అప్పుడు కూడా కాంగ్రెస్ ప్రభుత్వమే అధికారంలో ఉందని భండారీ చెప్పారు. మొదట 30 ఏళ్ల లీజుగా ఇచ్చిన ఆ భూమిని తర్వాత శాశ్వత లీజుగా మార్చారని వివరించారు. ఈ వ్యవహారం అవినీతి నిరోధక చట్టంలోని సెక్షన్ 13(1)(ఎ), 13(1)(బి) కింద నేరమని చెప్పారు. గాంధీ-వడ్రా కుటుంబంపై గతంలో వచ్చిన భూ కబ్జా ఆరోపణల మాదిరిగానే ఈ ట్రస్టు ద్వారా ఖర్గే కుటుంబం కూడా ప్రభుత్వ భూమిని ప్రైవేటుగా మార్చుకుందని భండారీ ఆరోపించారు. ఈ ఆరోపణలపై ఖర్గే కుటుంబం స్పందించాల్సి ఉంది.