తెలంగాణలో బీజేపీ జాతీయ అధ్యక్షుడు నితిన్ నబీన్ మూడు రోజుల పర్యటన

బీజేపీ జాతీయ అధ్యక్షుడు నితిన్ నబీన్ రేపు నుంచి మూడు రోజుల పాటు తెలంగాణలో పర్యటిస్తారు. గ్రేటర్ హైదరాబాద్‌లోని మూడు కార్పొరేషన్లు, వరంగల్ కార్పొరేషన్ ఎన్నికలను దృష్టిలో ఉంచుకుని ఈ పర్యటన సాగుతుంది. ఈ ఎన్నికలను బీజేపీ సెమీఫైనల్ గా పరిగణిస్తోంది.

నితిన్ నబీన్ రేపు హైదరాబాద్ చేరుకున్నాక శంషాబాద్‌లో కొత్త బీజేపీ జిల్లా కార్యాలయాన్ని ప్రారంభిస్తారు. వర్చువల్‌గా 10 జిల్లా కార్యాలయాలను కూడా ఆయన ప్రారంభిస్తారు. ఆపై నాంపల్లి ఎగ్జిబిషన్ గ్రౌండ్‌లో గ్రేటర్ హైదరాబాద్ పరిధిలోని బూత్ కమిటీ అధ్యక్షులతో సమావేశం అవుతారు. కార్పొరేషన్ ఎన్నికల్లో అనుసరించాల్సిన రూట్‌మ్యాప్‌పై ఈ సమావేశంలో దిశానిర్దేశం చేస్తారు.

రేపు సాయంత్రం 7 గంటలకు బీజేపీ రాష్ట్ర కార్యాలయంలో ఎంపీలు, ఎమ్మెల్యేలు, ఎమ్మెల్సీలతో కూడిన కీలక సమావేశం జరుగుతుంది. ఈ సమావేశంలో కొంతకాలంగా రాష్ట్ర నేతల మధ్య కనిపిస్తున్న అంతర్గత విభేదాలపై చర్చించి, ఐక్యంగా పనిచేయాలని సూచించే అవకాశం ఉంది. పార్టీ లైన్ దాటి ప్రవర్తిస్తున్న నేతలకు క్లాస్ తీసుకునే అవకాశం ఉన్నట్లు సమాచారం.

29వ తేదీన నబీన్ ఘట్కేసర్‌లోని సంస్థలో విద్యార్థులతో ఏర్పాటు చేసిన కాంక్లేవ్‌లో పాల్గొని ప్రసంగిస్తారు. ఆ తర్వాత వరంగల్ భద్రకాళి ఆలయాన్ని సందర్శించి, అక్కడ బూత్ అధ్యక్షులతో సమావేశమవుతారు. వరంగల్ కార్పొరేషన్ ఎన్నికల తయారీపై చర్చిస్తారు. తెగల నాయకులతో కూడా మాట్లాడతారు.

30వ తేదీన మరో ప్రైవేట్ హాల్‌లో రాష్ట్ర స్థాయి కార్యవర్గ సమావేశం జరుగుతుంది. ఇందులో ప్రభుత్వ వ్యతిరేక తీర్మానాలు, ముందస్తు అసెంబ్లీ ఎన్నికల వ్యూహంపై చర్చించనున్నారు. అనంతరం కోర్ కమిటీ సమావేశం ముగించుకుని నబీన్ ఢిల్లీ వెళ్లనున్నారు. పర్యటన ముగిసేసరికి పార్టీలో సమన్వయం పెరిగి, ఎన్నికల ముందస్తు ప్రణాళిక ఖరారయ్యే అవకాశం ఉంది.