గండిపేటలో మూసి ప్రాజెక్ట్ సమావేశం ఉద్రిక్తం

గండిపేటలో మూసి నదీ పరివాహక ప్రాంత అభివృద్ధి ప్రాజెక్టుకు సంబంధించి రెవెన్యూ, MRDCL అధికారులు శుక్రవారం నిర్వహించిన సమావేశం ఉద్రిక్తతకు దారితీసింది. స్థానిక కాలనీల ప్రతినిధులు, అధికారుల మధ్య వాగ్వాదం చోటుచేసుకుంది.

సమావేశంలో శివపురి దత్తాత్రేయ కాలనీ, శ్రీ విఘ్నేశ్వర కాలనీ, డ్రీమ్ హోమ్స్, కేరీవెల్ హోమ్స్, PG కాలనీ, విశాల్ నగర్, సాయిరామ్ నగర్ తదితర కాలనీల ప్రతినిధులు పాల్గొన్నారు. ప్రాజెక్ట్ నిర్మాణం కోసం ప్రభుత్వం భూములు సేకరించనున్నట్లు అధికారులు సమావేశంలో తెలిపారు.

దీంతో తీవ్ర ఆగ్రహం వ్యక్తం చేసిన నివాసితులు, ప్రాజెక్టును వ్యతిరేకిస్తున్నామని, ఇళ్లు ఖాళీ చేయబోమని హెచ్చరించారు. ప్రాజెక్టుకు సంబంధించిన డీపీఆర్‌ను ప్రభుత్వం బహిర్గతం చేయాలని, లేనిదే ఎలాంటి సహకారం లభించదని స్పష్టం చేశారు. నష్టపరిహారం కాదు, ప్రాజెక్టును రీడిజైన్ చేయాల్సిందేనని డిమాండ్ చేశారు.

అధికారులు నోటీసులు జారీ చేసి అభ్యంతరాలు స్వీకరించేందుకు ఈ సమావేశం ఏర్పాటు చేసినప్పటికీ, నివాసితులు తీవ్రస్థాయిలో నిరసన వ్యక్తం చేశారు. మాజీ ఎమ్మెల్యే అంజయ్ యాదవ్ నివాసితులకు మద్దతు ప్రకటించారు. సమావేశం రణరంగంగా మారడంతో అధికారులు చాలాసేపు చర్చలు జరిపినా ఫలితం లేకుండా పోయింది.

ఈ విషయంపై ప్రభుత్వం నుంచి స్పందన రావాల్సి ఉంది.