బోనాల ఉత్సవాలకు భారీ బందోబస్తు: డీసీపీ కిరణ్ ఖారే

చార్మినార్ డీసీపీ కిరణ్ ఖారే బోనాల పండుగ సందర్భంగా భద్రతా ఏర్పాట్లపై మాట్లాడారు. ప్రజలకు ఇబ్బందులు లేకుండా భారీ బందోబస్తు ఏర్పాటు చేస్తామని, నిరంతరం సీసీ కెమెరాలతో పర్యవేక్షిస్తామని తెలిపారు.

ఈ సందర్భంగా ఆయన పాతబస్తీలోని కాశీ విశ్వనాథ దేవాలయం, అక్కన్న మాదన్న దేవాలయాలను సందర్శించి ప్రత్యేక పూజలు నిర్వహించారు. అన్ని శాఖల అధికారులతో సమన్వయం చేసుకుని బోనాల ఉత్సవాలను విజయవంతంగా నిర్వహిస్తామని డీసీపీ పేర్కొన్నారు.

పోలీసు బలగాలతో పాటు బయటి జిల్లాల నుంచి కూడా అదనపు బలగాలు వస్తున్నాయని, సీసీ కెమెరాల నెట్వర్క్ ద్వారా నిఘా ఏర్పాటు చేశామని ఆయన వివరించారు. త్వరలోనే బోనాలకు సంబంధించిన మీటింగ్లు నిర్వహించి అన్ని వర్గాలతో చర్చిస్తామని తెలిపారు. ఏదైనా సమస్య లేదా సూచనలు ఉంటే పోలీసులను సంప్రదించాలని ప్రజలకు విజ్ఞప్తి చేశారు.