తుంగభద్ర రిజర్వాయర్‌లో పూడిక, నీటి నిల్వపై కేంద్ర కమిటీ తొలి సమావేశం

తుంగభద్ర జలాలకు సంబంధించి కేంద్రం ఏర్పాటు చేసిన ఉన్నత స్థాయి కమిటీ తొలి సమావేశం సోమవారం ఢిల్లీలో జరిగింది. హైబ్రిడ్ విధానంలో జరిగిన ఈ సమావేశంలో తెలంగాణ రాష్ట్ర అధికారులు వీడియో కాన్ఫరెన్స్ ద్వారా పాల్గొన్నారు.

తుంగభద్ర రిజర్వాయర్‌లో పేరుకు పోయిన పూడిక, తగ్గిన నీటి నిల్వ సామర్థ్యంపై చర్చించారు. సాగు, తాగునీటి అవసరాలు, దిగువ రాష్ట్రాల నీటి కేటాయింపుపై ఈ పరిస్థితి చూపే ప్రభావాన్ని కమిటీ పరిశీలించింది.

రాష్ట్ర అధికారులు రాజోలిబండు డైవర్షన్ స్కీమ్ (ఆర్‌డీఎస్) ఆనకట్ట మరమ్మతుల అంశాన్ని ప్రస్తావించారు. గతంలో నిపుణుల కమిటీ ఇచ్చిన నివేదికను ఆమోదించి, వెంటనే అమలు చేయాలని కోరారు. కమిటీ చైర్మన్ పక్షం రోజుల్లోగా అభిప్రాయాలు తెలియజేస్తామని చెప్పారు.

పూడిక తొలగింపు పద్ధతులు, ఖర్చులను అధ్యయనం చేసేందుకు ఒక సబ్‌కమిటీని ఏర్పాటు చేశారు. ఇతర రాష్ట్రాల్లో అమలవుతున్న పూడిక తొలగింపు విధానాలను అధ్యయనం చేయాలని నిర్ణయించారు. తదుపరి సమావేశం 15 రోజుల్లో జరుగుతుంది.