క్యాన్సర్ మందులపై కేంద్రం నిర్ణయం: 543 బ్రాండ్ల ధరలు 70-90 శాతం తగ్గుదల

నాన్ షెడ్యూల్డ్ క్యాన్సర్ మందులపై ట్రేడ్ మార్జిన్‌ను కేంద్ర ప్రభుత్వం గరిష్టంగా 30 శాతానికి పరిమితం చేసింది. ఈ నిర్ణయం 137 రకాల క్యాన్సర్ నిరోధక మందులకు వర్తిస్తుంది. ట్రేడ్ మార్జిన్ రేషనలైజేషన్ విధానం కింద ఈ నిర్ణయం తీసుకుంది. దీని వల్ల 543 బ్రాండ్ల క్యాన్సర్ మందుల ధరలు 70 నుంచి 90 శాతం వరకు తగ్గుతాయి.

కొన్ని మందుల కొత్త ధరలు ఇలా ఉన్నాయి. క్యాన్సర్ చికిత్సలో విస్తృతంగా వాడే అనాస్ట్రోజల్ 10 టాబ్లెట్ల ప్యాక్ ధర ₹695.76 నుంచి ₹73కి తగ్గింది. బెవాసిజుమాబ్ 100 mg ఇంజెక్షన్ ధర ₹21,767 నుంచి ₹5,930కి దిగింది. ఫుల్వెస్ట్రాంట్ 50 mg ఇంజెక్షన్ ధర ₹26,072 నుంచి ₹5,491కి తగ్గింది.

ధరలు తగ్గిన జాబితాలో 20కి పైగా క్యాన్సర్ రకాల చికిత్సల్లో వాడే ఇమ్యూనోథెరపీ మందులు ఉన్నాయి. రొమ్ము, ప్రోస్టేట్ క్యాన్సర్ రోగులకు వాడే మందులు కూడా ఇందులో ఉన్నాయి. న్యూట్రోపెనియా నివారణకు ఉపయోగించే పెగ్‌ఫిల్‌గ్రాస్టిమ్ కూడా జాబితాలో ఉంది. పెద్ద ప్రేగు, అండాశయ, గర్భాశయ క్యాన్సర్ల చికిత్సలో వాడే బెవాసిజుమాబ్ కూడా ఇందులో చేరింది.

క్యాన్సర్ మందులను భారీ ధరలకు అమ్మడంపై సుప్రీంకోర్టు తీవ్ర అసంతృప్తి వ్యక్తం చేసింది. ఈ భారీ ధరలను దోపిడీగా అభివర్ణించింది. ఆ డబ్బు ఎక్కడికి పోతుందని ప్రశ్నించింది. తన భార్య క్యాన్సర్ చికిత్స కోసం ఆసుపత్రికి వెళ్లిన ఓ మెడిసిన్ డీలర్‌కు ఎదురైన పరిస్థితిని కోర్టు ప్రస్తావించింది. ఇంజెక్షన్ అసలు విలువ కంటే ఆసుపత్రి చాలా ఎక్కువ ధర వసూలు చేసినట్లు కోర్టు పేర్కొంది. ఈ నేపథ్యంలో కేంద్ర ప్రభుత్వం ధరలను సవరించింది.

65 హై కాస్ట్ సింగిల్ సోర్స్ మందుల ధరల్లో మాత్రం ఎలాంటి మార్పు ఉండదు. నవంబర్ 9 నుంచి కొత్త ధరలు దేశవ్యాప్తంగా అమల్లోకి వస్తాయి.