ఫౌజీ టీజర్‌పై నేతాజీ కుటుంబ సభ్యుడి అభ్యంతరం.. తొలగించాలని డిమాండ్

ప్రభాస్ హీరోగా, హను రాఘవపూడి దర్శకత్వంలో తెరకెక్కుతున్న 'ఫౌజీ' సినిమా టీజర్ వివాదంలో కూరుకుపోయింది. ప్రభాస్ పుట్టినరోజు సందర్భంగా విడుదలైన ఈ టీజర్‌పై నేతాజీ సుభాష్ చంద్రబోస్ కుటుంబ సభ్యుడు చంద్రకుమార్ బోస్ అభ్యంతరం వ్యక్తం చేశారు.

టీజర్‌లో చారిత్రక వ్యక్తులను కల్పిత కథతో ముడిపెట్టి చూపించడం ద్వారా నేతాజీ గౌరవం తగ్గిందని చంద్రకుమార్ బోస్ ఆరోపించారు. ఈ టీజర్‌ను వెనక్కి తీసుకోవాలని ఆయన డిమాండ్ చేశారు. దర్శకుడు హను రాఘవపూడి, చిత్ర నిర్మాణ సంస్థల తీరుపై అసంతృప్తి వ్యక్తం చేశారు.

ఈ వ్యవహారంపై విచారణ జరిపించాలని కోరుతూ చంద్రకుమార్ బోస్ కేంద్ర సమాచార, ప్రసార శాఖ మంత్రి అశ్విని వైష్ణవ్‌కు లేఖ రాశారు. టీజర్‌తో పాటు సినిమాలోనూ నేతాజీకి సంబంధించిన అంశాలను బాధ్యతాయుతంగా చూపించాలని ఆ లేఖలో కోరారు.

టీజర్‌ను తొలగించాలని, విచారణ జరపాలని చంద్రకుమార్ బోస్ చేసిన డిమాండ్‌పై చిత్ర యూనిట్, కేంద్రం నుంచి ఇంకా స్పందన లభ్యం కాలేదు.