హైదరాబాద్‌లో రేపు మెగా రక్తదాన శిబిరాలు: 37 కేంద్రాలు, 28 బ్లడ్ బ్యాంకుల సహకారం

పోలీస్ అమరవీరుల సంస్మరణ వారోత్సవాల్లో భాగంగా హైదరాబాద్‌లో రేపు మెగా రక్తదాన శిబిరాలు నిర్వహిస్తున్నట్లు పోలీస్ కమిషనర్ సజ్జనార్ తెలిపారు. హైదరాబాద్ కమిషనరేట్ పరిధిలో 37 కేంద్రాల్లో ఈ శిబిరాలు ఏర్పాటు చేస్తున్నారు.

28 బ్లడ్ బ్యాంకుల సహకారంతో భారీగా రక్తం సేకరించనున్నట్లు ఆయన చెప్పారు. గత సంవత్సరం ఈ వారోత్సవాల్లో దాదాపు 5,000 యూనిట్లకు పైగా రక్తం సేకరించినట్లు తెలిపారు. ప్రజలు చూపిన సహకారానికి ధన్యవాదాలు తెలిపారు.

రక్తదానం చేయడం ద్వారా పోలీస్ అమరవీరుల త్యాగాలకు నిజమైన నివాళి అర్పించవచ్చని సజ్జనార్ పిలుపునిచ్చారు. రక్తదాతలే ఆపదలో ఉన్నవారికి ప్రాణదాతలని ఆయన అన్నారు. ఎమర్జెన్సీ సమయంలో రక్త కొరత వల్ల ఒక్క ప్రాణం కూడా పోకూడదన్నది తమ లక్ష్యమని తెలిపారు. ఆస్పత్రుల్లోని రోగులకు రక్తం చాలా అవసరమని ఆయన గుర్తు చేశారు.

కాలేజీ యువత, 50 సంవత్సరాలలోపు ఫిట్‌గా ఉన్నవారు ముందుకు వచ్చి రక్తదానం చేయాలని కోరారు. రక్తం ఇస్తే ఏమైనా అవుతుందన్న భయం అవసరం లేదని స్పష్టం చేశారు. మూడు నెలలకు ఒకసారి రక్తదానం చేయవచ్చని తెలిపారు. దీనివల్ల శరీరం ఫిట్‌గా ఉంటుందని కూడా ఆయన చెప్పారు.