రబీ వేరుశనగ సాగుకు అధిక దిగుబడి ఇచ్చే కొత్త రకాలు అందుబాటులో

రబీ సీజన్‌లో వేరుశనగ సాగు చేసే రైతులకు పాత రకాల స్థానంలో అధిక దిగుబడి ఇచ్చే కొత్త రకాలు అందుబాటులో ఉన్నాయి. వేరుశనగ నూనె గింజల పంటల్లో ప్రధానమైనది. తెలుగు రాష్ట్రాల్లో దీన్ని అధిక విస్తీర్ణంలో సాగు చేస్తారు.

ఆంధ్రప్రదేశ్‌లోని ఉత్తర కోస్తా, దక్షిణ రాయలసీమ ప్రాంతాల్లో రబీ వేరుశనగ ఎక్కువగా సాగవుతుంది. ఈ ప్రాంతాల్లో నవంబర్ నుంచి డిసెంబర్ 15 వరకు విత్తుకోవడం అనుకూలమని అనకాపల్లి జిల్లా ఎలమంచిలి వ్యవసాయ పరిశోధన స్థానం శాస్త్రవేత్త శిరీష తెలిపారు. నీటి వసతి ఉన్న రైతులు రబీలో ఈ పంట వేసుకోవచ్చని ఆమె చెప్పారు.

కరీఫ్‌లో వేరుశనగ వర్షాధార పంట. ఆ కాలంలో వాతావరణ ఒడిదుడుకులు దిగుబడిని దెబ్బతీస్తాయి. రబీలో వాతావరణం కొంత స్థిరంగా ఉంటుంది. నీటి కింద సాగు చేయడం వల్ల దిగుబడి ఎక్కువగా వస్తుందని శిరీష వివరించారు. ఇసుకతో కూడిన గడప నేలలు, నీరు ఇంకే స్వభావం ఉన్న ఎర్ర చలకా నేలలు ఈ పంటకు అనుకూలం. ప్రాంతానికి తగిన రకాలను ఎంపిక చేసుకోవాలని ఆమె సూచించారు.

టీసీజీఎస్ 1694 అనే కొత్త రకం 2022లో విడుదలైంది. ఈ రకం పంట కాలం 100 నుంచి 105 రోజులు. నూనె శాతం 49 శాతం, షెల్లింగ్ శాతం 70 నుంచి 72 శాతం ఉంటుందని శిరీష తెలిపారు. ఈ రకం విత్తనాలు తిరుపతిలోని రీజినల్ అగ్రికల్చరల్ రీసెర్చ్ స్టేషన్, ఆచార్య ఎన్.జి. రంగ వ్యవసాయ విశ్వవిద్యాలయం (ANGRAU) వద్ద లభిస్తాయి.

రబీలో కదిరి-6, కదిరి-7, ధీరజ్, ధరణి, గ్రీష్మ, నిత్యహరిత రకాలను కూడా సాగు చేయవచ్చు. వీటిలో కదిరి-6 బోల్డ్ రకం. ఇది చాలా పాత రకం అని శిరీష తెలిపారు.