గుడివాడలో సీఎం చంద్రబాబు ప్రసంగం: రూ.15,274 కోట్ల పట్టణాభివృద్ధి పనులకు శంకుస్థాపన

ముఖ్యమంత్రి చంద్రబాబు నాయుడు గుడివాడలో పలు అభివృద్ధి పనులకు శంకుస్థాపన చేశారు. ఈ సందర్భంగా ఆయన మాట్లాడుతూ, రాష్ట్రంలో పట్టణాల అభివృద్ధి కోసం భారీ ఎత్తున నిధులు కేటాయిస్తున్నట్లు తెలిపారు.

ఏఎంఆర్‌యూటీ, ఏఐఐబీ, యూఏడీఎఫ్ వంటి పథకాల కింద 120 స్థానిక సంస్థల్లో రూ.15,274 కోట్లతో వివిధ పనులు ప్రారంభించినట్లు సీఎం వెల్లడించారు. వీటిలో 514 ప్రజారోగ్య మున్సిపల్ ఇంజనీరింగ్ ప్రాజెక్ట్లు ఉన్నాయి. మురుగునీటి శుద్ధి కోసం ఎస్టీపీలు, ఓవర్‌హెడ్ రిజర్వాయర్లు, త్రాగునీటి పైప్‌లైన్లు, అండర్‌గ్రౌండ్ డ్రైనేజీ, చెరువుల అభివృద్ధి వంటి పనులు చేపడుతున్నారు.

చెత్త సేకరణకు ఎలక్ట్రిక్ వాహనాలు వినియోగిస్తున్నట్లు చెప్పారు. ఈరోజు 126 ఎలక్ట్రిక్ ఆటోలను ప్రారంభించగా, ఆగస్టు 26 నాటికి మొత్తం 1,140 ఆటోలను అందుబాటులోకి తీసుకువస్తామన్నారు. రాష్ట్రవ్యాప్తంగా 108 వ్యర్థాల ప్రాసెసింగ్ కేంద్రాలను రూ.528 కోట్లతో ఏర్పాటు చేస్తున్నట్లు, వీటిలో 8 కేంద్రాలు ఈరోజు ప్రారంభమైనట్లు తెలిపారు. అక్టోబర్ నాటికి అన్ని కేంద్రాలు పూర్తవుతాయన్నారు.

'ప్రజారథం' కార్యక్రమం ద్వారా చెత్తకు బదులుగా నిత్యావసర వస్తువులు ఇస్తున్నామని, ఇప్పటి వరకు రూ.16 కోట్లు విలువైన వస్తువులు ఇచ్చినట్లు సీఎం చెప్పారు. వ్యర్థాల నుంచి సంపద సృష్టించడమే ప్రభుత్వ లక్ష్యమని పేర్కొన్నారు.

ప్రసంగంలో ఆయన కొందరి విరాళాలను ప్రస్తావించారు. ఒక బాలుడు తన పొదుపు డబ్బులను, మరో వ్యక్తి రూ.3 కోట్లను అమరావతి రాజధానికి విరాళంగా ఇచ్చారు. గుడివాడ బస్‌స్టాండ్ పునర్నిర్మాణానికి నరసింహారావు అనే వ్యక్తి రూ.3 కోట్లు ఇచ్చినట్లు సీఎం చెప్పారు.