కర్నూలు జిల్లా స్వర్ణగిరిలో జ్యువెలరీ పార్క్‌పై సీఎం చంద్రబాబు ప్రతిపాదన

ముఖ్యమంత్రి నారా చంద్రబాబు నాయుడు కర్నూలు జిల్లా స్వర్ణగిరిలో ఒక జ్యువెలరీ పార్క్ ఏర్పాటు చేయాలని ప్రతిపాదించారు. ఈ ప్రాంతంలో ఆభరణాల తయారీ యూనిట్లు ఏర్పాటు చేస్తే ప్రపంచ మార్కెట్‌లో స్వర్ణగిరి కీలక కేంద్రంగా మారుతుందని ఆయన అభిప్రాయపడ్డారు.

ఆంధ్రప్రదేశ్‌లో వివిధ రకాల ఖనిజాలు పుష్కలంగా ఉన్నాయని సీఎం వివరించారు. మంగంపేటలో బెరైట్స్, రాయలసీమలో సున్నపురాయి, విశాఖ ఏజెన్సీలో యురేనియం, బాక్సైట్, చీమకుర్తిలో గెలాక్సీ గ్రానైట్, కుప్పంలో గ్రీన్ గ్రానైట్, శ్రీకాకుళంలో బ్లూ గ్రానైట్, గూడూరులో మైక, నెల్లూరు జిల్లాలో సిలికా, ఉత్తరాంధ్రలో బీచ్ శాండ్, అనంతపూర్, మదనపల్లిలో ఇనుప ఖనిజం ఉన్నాయని చెప్పారు. కృష్ణా-గోదావరి బేసిన్‌లో గ్యాస్, పెట్రోలియం నిల్వలు, ఏలూరు సమీపంలో బొగ్గు గనులు కూడా ఉన్నాయని తెలిపారు.

ఈ ఖనిజాలను సద్వినియోగం చేసుకుంటే రాష్ట్రంలోని యువతకు ఉపాధి అవకాశాలు మెరుగవుతాయని, వారు ఇతర ప్రాంతాలకు వలస వెళ్లాల్సిన అవసరం తగ్గుతుందని సీఎం అభిప్రాయపడ్డారు. స్వర్ణగిరి ప్రాంతంలో ఇప్పటికే బంగారు గని, సిమెంట్ ఫ్యాక్టరీలు ఏర్పాటవుతున్నాయని, ఇనుప ఖనిజంతో పరిశ్రమలు అభివృద్ధి చెందుతాయని చంద్రబాబు ఆశాభావం వ్యక్తం చేశారు.