అన్నదాత సుఖీభవ: నేడు రైతులకు నిధులు విడుదల చేయనున్న సీఎం చంద్రబాబు

పల్నాడు జిల్లా లింగంగుంట్లలో సీఎం చంద్రబాబు నాయుడు నేడు అన్నదాత సుఖీభవ పథకం నిధులు విడుదల చేయనున్నారు. ఈ పథకం కింద అర్హత కలిగిన రైతు కుటుంబాలకు ఏడాదికి రూ.20,000 ఆర్థిక సహాయం అందుతుంది. ఇందులో రాష్ట్ర ప్రభుత్వం రూ.14,000, కేంద్ర ప్రభుత్వం పీఎం కిసాన్ పథకం కింద రూ.6,000 అందిస్తుంది.

తొలి విడతలో భాగంగా రైతుకు రూ.7,000 చొప్పున వారి ఖాతాల్లో జమ చేయనున్నారు. రాష్ట్రం నుంచి రూ.5,000, కేంద్రం నుంచి రూ.2,000 కలిపి ఈ మొత్తం అందనుంది. రాష్ట్రవ్యాప్తంగా 46,85,838 మంది రైతు కుటుంబాలకు లబ్ధి చేకూరనుంది. వీరిలో అటవీ హక్కుల చట్టం కింద సాగు చేస్తున్న 16,000 మంది రైతులు ఉన్నారు. మొత్తం రూ.3,125.47 కోట్లు రైతుల ఖాతాల్లో జమ కానున్నాయి. ఇందులో రాష్ట్ర ప్రభుత్వం వాటా రూ.2,342.92 కోట్లు, కేంద్రం వాటా రూ.782.55 కోట్లు.

సీఎం చంద్రబాబు నాయుడు మధ్యాహ్నం లింగంగుంట్లకు చేరుకుంటారు. అక్కడ ఆంగన్వాడి కేంద్రం, అగ్రికల్చర్ ఫీల్డ్, హార్టికల్చర్ ప్రాంతాలు, పశు షెడ్లను పరిశీలిస్తారు. అనంతరం క్యాడర్ సమావేశం, ప్రజావేదిక సభలో నిధుల విడుదల చేసి ప్రసంగిస్తారు. ఈ ఏర్పాట్లను స్థానిక ఎమ్మెల్యే ప్రత్తిపాటి పుల్లారావు పర్యవేక్షించారు.