ఛత్తీస్‌గఢ్‌లో మావోయిస్టు డంపులు స్వాధీనం — 11 ఆయుధాలు, రూ.24 లక్షల నగదు లభ్యం

ఛత్తీస్‌గఢ్‌లోని నారాయణపూర్ జిల్లాలో పోలీసులు రెండు భారీ మావోయిస్టు డంపులను స్వాధీనం చేసుకున్నారు. టేక్లా అటవీ ప్రాంతంలో దొరికిన మొదటి డంపులో 11 అధునాతన ఆయుధాలు, పేలుడు పదార్థాలు లభ్యమయ్యాయి. మరో డంపు కోహకామీట అటవీ ప్రాంతంలో గుర్తించారు. అందులో రూ.24 లక్షల నగదు ఉన్నట్టు అధికారులు వెల్లడించారు.

పోలీసులు, కేంద్ర బలగాలు సంయుక్తంగా ఈ దాడులు జరిపాయి. ఇటీవల లొంగిపోయిన మావోయిస్టులు ఇచ్చిన సమాచారంతో ఈ డంపులను గుర్తించినట్లు తెలిసింది. గతంలో కూడా ఇదే జిల్లాలో కొన్ని కేజీల బంగారం, కోటి రూపాయల నగదు దొరికిందని పోలీసులు తెలిపారు.

మావోయిస్టుల ఆస్తులు, ఆయుధాల కోసం రాష్ట్రంలోని పలు జిల్లాల్లో సెర్చింగ్ కొనసాగుతోంది. ఇంకా చాలా డంపులు ఉన్నాయని, కోట్లాది రూపాయల విలువైన సామగ్రి ఉండొచ్చని అధికారులు అనుమానిస్తున్నారు. ప్రస్తుతం డంపులను వెలికి తీసే పనులు జరుగుతున్నాయి.