సాయి కృష్ణ కేసు: సిఐ నాగరాజుకు వైద్య పరీక్షలు, తర్వాత కోర్టులో హాజరు

విజయవాడలోని సాయి కృష్ణ కేసులో సిఐ నాగరాజును వైద్య పరీక్షల కోసం ప్రభుత్వ ఆసుపత్రికి తీసుకొచ్చారు. వైద్య పరీక్షల అనంతరం ఆయనను మెజిస్ట్రేట్ ముందు హాజరు పరచనున్నారు.

సిట్ అధికారులు సిసిటీవీ ఫుటేజ్ మాయంపై కీలక సమాచారం సేకరించారు. కృష్ణలంక పోలీస్ స్టేషన్, టాస్క్ ఫోర్స్ కార్యాలయం, సిపి ఆఫీసు, కమాండ్ కంట్రోల్ రూమ్ పరిసర ప్రాంతాల్లో సిసిటీవీ ఫుటేజ్ మాయం చేసినట్టు గుర్తించారు. నాగరాజు టెక్నికల్ కారణంగా ఫుటేజ్ పోయిందని సిట్ కు చెప్పారు. ఉద్దేశపూర్వకంగా ఆధారాలు ధ్వంసం చేసినట్టు సిట్ అధికారులు అనుమానిస్తున్నారు.

10 గంటల పాటు సాగిన విచారణలో సాయి కృష్ణను ఎవరి ఆదేశాల మేరకు తీసుకొచ్చారు, అతడిని ఏమి చేశారు, హత్య చేసి ఉంటే మృతదేహం ఎక్కడ ఉందనే అంశాలపై నాగరాజును ప్రశ్నించారు. ఈ కేసులో నాగరాజుపై హత్య కేసు నమోదు చేశారు. నాగరాజు పూర్తిగా సహకరించలేదని తెలుస్తోంది.

నాగరాజు స్టేట్మెంట్ రికార్డ్ చేశారు. ఐజీ రవి ప్రకాష్ నాగరాజును సిసిటీవీ మాయంపై ప్రశ్నించారు. నాగరాజు టెక్నికల్ లోపం చూపడంతో పాటు ఇతర వివరాలు ఇవ్వలేదు. నాగరాజుతో పాటు కృష్ణలంక, టాస్క్ ఫోర్స్, స్వర్గపురి పోలీస్ సిబ్బంది నుండి స్టేట్మెంట్లు తీసుకున్నారు. సాయి కృష్ణ కుటుంబం ఆరోపించిన ఆరుగురు సిబ్బంది పాత్రపై ఆధారాలు లభిస్తే వారిని నిందితులుగా చేర్చే అవకాశం ఉంది.

నిన్న నాగరాజు అరెస్ట్ సమయంలో మద్దతుదారులు చేసిన ఆందోళన దృష్ట్యా, నేడు ఆస్పత్రి వద్ద, కోర్టు వద్ద భారీ పోలీస్ బందోబస్తు ఏర్పాటు చేశారు. కొద్దిసేపట్లో నాగరాజును విజయవాడ సివిల్ కోర్టులో హాజరు పరుస్తారు. రిమాండ్ నివేదికలో విచారణ వివరాలు, ఆధారాలు సమర్పిస్తారు.