గిరిజన విద్యార్థిని శివాని మృతిపై సీఎం చంద్రబాబు స్పందన; పూర్తి దర్యాప్తుకు ఆదేశం

ముఖ్యమంత్రి చంద్రబాబు నాయుడు గిరిజన విద్యార్థిని ముర్రం శివాని మృతిపై విచారం వ్యక్తం చేశారు. ఈ ఘటన తనను తీవ్ర విషాదంలోకి నెట్టిందని ఆయన అన్నారు. శివాని మృతిపై పూర్తి దర్యాప్తు జరపాలని అధికారులను ఆదేశించినట్లు సీఎం తెలిపారు.

గతంలో పిటిఎం వేదికపై శివాని తన చదువు, ఉన్నత లక్ష్యాల గురించి ఉత్సాహంగా మాట్లాడినట్లు చంద్రబాబు గుర్తు చేశారు. ఆమె భవిష్యత్తు బాగుండేదని, ఆమె మరణం బాధాకరమని చెప్పారు.

యువత, విద్యార్థులు ఎదురయ్యే సమస్యలు, కష్టాలను ధైర్యంగా ఎదుర్కోవాలని సీఎం సూచించారు. ఒత్తిడి, నిరాశకు లోను కావద్దని, కుటుంబ సభ్యులు, స్నేహితులతో బాధను పంచుకోవాలని ఆయన కోరారు. ప్రభుత్వం అన్ని విధాలా అండగా ఉంటుందని స్పష్టం చేశారు.