కొబ్బరికాయ కొట్టేటప్పుడు చదివే వేదమంత్రం, ఫలితాల వివరాలు ఇవే

హిందూ సంప్రదాయంలో కొబ్బరికాయ కొట్టడం ఒక ముఖ్యమైన ఆచారం. కొబ్బరికాయ కొట్టేటప్పుడు ఒక మంత్రం చదవాలని మంత్రశాస్త్రం చెబుతోంది. అది ఎలా పగిలిందో దాన్ని బట్టి వచ్చే ఫలితాలను ధర్మశాస్త్రాలు వివరించాయి.

కొబ్బరికాయ పెంకు మనిషిలోని అహంకారానికి ప్రతీక. అది పగిలితే అహంకారం తొలగిపోతుంది. లోపల తెల్లటి కొబ్బరి సత్వగుణాన్ని సూచిస్తుంది. లోపల ఉన్న నీరు ఆత్మ పరమాత్మలో లీనం కావడానికి సంకేతం. కాబట్టి, కొబ్బరికాయ కొట్టడం అంటే అహంకారాన్ని వదిలి దైవానుగ్రహం పొందడం.

కొబ్బరికాయ సమానంగా అడ్డంగా పగిలితే కార్యసిద్ధి, ధనలాభం కలుగుతాయి. నిలువుగా పగిలితే వంశాభివృద్ధి జరుగుతుంది. ఒక ముక్క పెద్దది, మరొకటి చిన్నదిగా పగిలితే మానసిక ఆందోళన, పనుల్లో ఆటంకాలు ఎదురవుతాయి. అలాంటప్పుడు మళ్లీ కొత్త కొబ్బరికాయ కొడితే విఘ్నాలు తొలగిపోతాయి. కొబ్బరికాయ కుళ్ళిపోతే అది ‘దూషిత ఫలం’ అని పిలుస్తారు. ఇది చూసినవారి దృష్టిదోషం పోతుందని ధర్మశాస్త్రం చెప్తుంది. లోపల పువ్వు ఉంటే అది ఆకస్మిక అదృష్టానికి, ధనలాభానికి సంకేతం.

మంత్రశాస్త్రం ప్రకారం, కొబ్బరికాయ కొట్టేటప్పుడు ఈ మంత్రం చదవాలి: “యాహ ఫలనీర్య అఫల అపుష్పాయాశ్చ పుష్పినీహి బృహస్పతి ప్రసూతాస్త నో ముంచంతు అంహసః”. దీని అర్థం: “ఫలించే చెట్లు, ఫలించని చెట్లు, పుష్పించే చెట్లు, పుష్పించని చెట్లు అన్నింటికీ అధిపతి అయిన పరమేశ్వరుడు మా పాపాలను తొలగించాలి.” ఈ మంత్రం ఋగ్వేదం, యజుర్వేదంలో ఉన్నట్లు తెలుస్తోంది. దీన్ని జపిస్తూ కొబ్బరికాయ కొడితే సమస్త శుభాలు కలుగుతాయని పండితులు వివరిస్తున్నారు.