హైదరాబాద్‌- విజయవాడ హైవేపై కొయ్యలగూడెం వద్ద కంటైనర్ బోల్తా.. భారీ ట్రాఫిక్ జామ్

యాదాద్రి భువనగిరి జిల్లా చౌటుప్పల్ మండలం కొయ్యలగూడెం వద్ద హైదరాబాద్-విజయవాడ జాతీయ రహదారిపై శనివారం తెల్లవారుజామున ఓ కంటైనర్ అదుపు తప్పి బోల్తా కొట్టింది.

రోడ్డుకు అడ్డంగా పడిపోయిన కంటైనర్ కారణంగా ఇరువైపులా వాహనాలు నిలిచిపోయాయి. సుమారు 3 నుంచి 4 కిలోమీటర్ల మేర ట్రాఫిక్ జామ్ ఏర్పడింది.

ధర్మోజిగూడెం వద్ద కొనసాగుతున్న ఫ్లైఓవర్ నిర్మాణ పనుల కోసం ట్రాఫిక్ను సర్వీస్ రోడ్డుకు మల్లించడంతో అప్పటికే ఇరుకైన మార్గంలో వాహనాలు నెమ్మదిగా కదులుతున్నాయి. ఈ నేపథ్యంలో ప్రమాదం జరగడంతో పరిస్థితి మరింత తీవ్రమైంది.

వీకెండ్ కావడంతో హైదరాబాద్-విజయవాడ మధ్య రాకపోకలు ఎక్కువగా ఉన్నాయి. దీంతో వాహనాల సంఖ్య పెరిగి జామ్ మరింత ఘనీభవించింది. చౌటుప్పల్ పోలీసులు సంఘటనా స్థలానికి చేరుకుని కంటైనర్ను తొలగించడానికి, ట్రాఫిక్ క్లియర్ చేయడానికి ప్రయత్నాలు చేస్తున్నారు. ప్రమాదం వల్ల ప్రయాణికులు తీవ్ర ఇబ్బందులు పడ్డారు.